കണ്ണൂര്‍: ജില്ലയിലെ കണ്ണൂര്‍, പയ്യന്നൂര്‍, തളിപ്പറമ്പ്, കല്ല്യാശ്ശേരി എന്നീ 4 നിയോജകമണ്ഡലങ്ങളില്‍ സമ്പൂര്‍ണ വൈദ്യുതീകരണം പൂര്‍ത്തിയായതിന്റെ പ്രഖ്യാപനം ഇന്ന് വൈദ്യുതി മന്ത്രി എം.എം.മണി നിര്‍വഹിക്കും. സംസ്ഥാനത്ത് ഇതുവരെ വൈദ്യുതി ലഭ്യമാകാത്ത മുഴുവന്‍ വീടുകളിലും സൗജന്യമായി വൈദ്യുതി എത്തിക്കുക എന്ന സര്‍കാര്‍ ലക്ഷ്യം പൂര്‍ത്തിയാക്കുന്നതിന്റെ ഭാഗമായാണ് പ്രഖ്യാപനം. എംഎല്‍എമാരും മറ്റ് ജനപ്രതിനിധികളും കെഎസ്ഇബി ഉദ്യോഗസ്ഥരും വ്യക്തികളും സ്ഥാപനങ്ങളും കൂട്ടായാണ് 172 കോടി ചെലവില്‍ സംസ്ഥാനത്തെ ഇനിയും വൈദ്യുതി ലഭിച്ചിട്ടില്ലാത്ത ഒന്നരലക്ഷത്തോളം കുടുംബങ്ങള്‍ക്ക് വൈദ്യുതി എത്തിക്കുന്നത്.
3 മണിക്ക് പിലാത്തറ ബസ്റ്റാന്റ് പരിസരത്തും 4 ന് പയ്യന്നൂര്‍ ഗാന്ധി പാര്‍ക്കിലും 4.30 ന് തോട്ടടയിലും നടക്കുന്ന ചടങ്ങുകളിലാണ് പ്രഖ്യാപനം നടക്കുക. മന്ത്രി രാമചന്ദന്‍ കടന്നപ്പള്ളി, മേയര്‍ ഇ.പി.ലത, എം.പിമാരായ പി.കെ.ശ്രീമതി, പി.കരുണാകരന്‍, ടി.വി.രാജേഷ് എംഎല്‍എ, ജില്ലാപഞ്ചായത്ത് പ്രസിഡന്റ് കെ.വി.സുമേഷ്, ജില്ലാകലക്ടര്‍ മിര്‍ മുഹമ്മദ് അലി എന്നിവര്‍ ചടങ്ങുകളില്‍ മുഖ്യാതിഥികളാവും.
