കണ്ണൂര്: കുട്ടികളിലെ സ്വഭാവരൂപീകരണത്തിന് യോഗാ പഠനം അനിവാര്യമാണെന്ന് നഗരസഭ മേയര് ഇ.പി.ലത. നാഷ്ണല് ചൈല്ഡ് ഡെവലപ്പ്മെന്റ് കൗണ്സില് കേരള റീജിയണിന്റെ ആഭിമുഖ്യത്തില് സംഘടിപ്പിക്കുന്ന ദിദ്വിന സൗജന്യ അഡ്വാന്സ്ഡ് മെഡിറ്റേഷന് പരിശീലനം ഉദ്ഘാടനം ചെയ്യുകയായിരുന്നു അവര്. സ്കൂളുകളിലും കോളേജുകളിലും യോഗാ പഠനം നിര്ബന്ധമാക്കണമെന്നും മേയര് കൂട്ടിച്ചേര്ത്തു.
ശിക്ഷക് സദന് ഹാളില് നടന്ന ചടങ്ങില് സാമുഹ്യ സേവനരംഗത്ത് പ്രനര്ത്തിക്കുന്ന ടി.കെ.സി. അഹമ്മദ്, യോഗാചാര്യന് പ്രഭാകരന് മാസ്റ്റര്, ലിംക ബുക്ക് റെക്കോര്ഡ് ജേതാവ് ഹരിമോഹനന് കരിവള്ളൂര്, പരിസ്ഥിതി പ്രവര്ത്തകന് രാജന് വേങ്ങാട്, ഗിന്നസ്ബുക്ക് ജേതാവ് പ്രിജേഷ് കണ്ണന്, ഹെല്ത്ത് മോട്ടിവേറ്റര് ഷുക്കൂര് കാഞ്ഞങ്ങാട്, യുവ സംരംഭകന് രജീഷ് പൂച്ചാലി, മജീഷ്യന് പ്രശാന്ത് വേങ്ങാട് എന്നിവരെ പുരസ്കാരം നല്കി ആദരിച്ചു. ഒരുലോകം ഒരു ഭാഷ പ്രസ്ഥാനത്തിന്റെ സ്ഥാപകന് ബാബ അലക്സാണ്ടര് (ന്യൂഡല്ഹി) ആണ് പരിശീലനത്തിന് നേതൃത്വം വഹിക്കുന്നത്. വൈകിട്ട് 5 വരെ നടക്കുന്ന പരിശീലനം ഇന്ന് സമാപിക്കും. മനോനിയന്ത്രണത്തിനുള്ള വിദ്യകള്, വിവിധ പ്രാണായാമങ്ങള്, വിവിധ മെഡിറ്റേഷനുകള് തുടങ്ങിയ വിഷയങ്ങളില് അഡ്വാന്സ്ഡ് തിയറി, പ്രായോഗിക പരിശീലനവുമാണ് നല്കുന്നത്. ഫോണ്: 9510881166.
