21പേരൂര്ക്കട: കുടിവെള്ളം ലഭിക്കാത്തതില് പ്രതിഷേധിച്ച് നാട്ടുകാര് വാട്ടര്അതോറിറ്റിയുടെ വാഹനം തടഞ്ഞിട്ടു. പരുത്തിപ്പാറ ജംഗഷ്നിലായിരുന്നു നാട്ടുകാര് പ്രതിഷേധസമരം നടത്തിയത്. പേരൂര്ക്കടയില്നിന്ന് പരുത്തിപ്പാറയിലേക്കും തുടര്ന്ന് പോങ്ങുമ്മൂട്, ശ്രീകാര്യം, കരിയം ഭാഗത്തേക്കും കടന്നുപോകുന്ന 900 എം.എം പ്രിമോ പൈപ്പുമായി ബന്ധപ്പെട്ടുള്ള എയര്വാല്വില് കഴിഞ്ഞദിവസം അറ്റകുറ്റപ്പണി നടത്തിയിരുന്നു. വാല്വിന്റെ പ്രവര്ത്തനം തടസ്സപ്പെട്ടതോടെ വാല്വിനു പുറത്തുകൂടി അമിതമായി ജലം പോകുന്നതായിരുന്നു പ്രശ്നം. ഇതോടെ വാട്ടര്അതോറിറ്റി സ്ഥലത്തെത്തുകയും വാല്വിന്റെ അറ്റകുറ്റപ്പണി ആരംഭിക്കുകയും ചെയ്തു. എന്നാല് പ്രശ്നം പൂര്ണ്ണമായി പരിഹരിക്കപ്പെട്ടില്ല. ഇതിനിടെ പ്രധാന പൈപ്പില്നിന്ന് വീടുകളിലേക്കുള്ള സബ്ലൈനിനോടനുബന്ധിച്ച് ഘടിപ്പിച്ചിട്ടുള്ള ചെറിയ വാല്വുകളിലും പ്രശ്നം തുടങ്ങി. ഇതോടെ വാട്ടര്അതോറിറ്റി വാല്വ് അടച്ച് സ്ഥലം വിടുകയായിരുന്നു. മണിക്കൂറുകള് കഴിഞ്ഞിട്ടും വെള്ളം ലഭിക്കാതായതോടെയാണ് ഇന്നലെ രാവിലെ ജനങ്ങള് പ്രതിഷേധവുമായി രംഗത്തെത്തിയത്. വെള്ളം കിട്ടാതായതോടെ വാട്ടര്അതോറിറ്റി അധികൃതര് വീണ്ടും സ്ഥലത്തെത്തി. എമര്ജന്സി വര്ക്കുകള് ചെയ്യുന്ന വാട്ടര്അതോറിറ്റിയുടെ ബ്ലൂ ബ്രിഗേഡ് സ്ഥലത്തെത്തിയെങ്കിലും നാട്ടുകാര് അവരുടെ വാഹനം തടഞ്ഞുവച്ചു.
വൈകുന്നേരത്തോടെ വെള്ളമെത്തുമെന്ന് വാട്ടര്അതോറിറ്റി ഉദ്യോഗസ്ഥര് അറിയിച്ചതോടെ നാട്ടുകാര് പിരിഞ്ഞുപോയി. എന്നാല് മണിക്കൂറുകള് കഴിഞ്ഞിട്ടും പ്രശ്നം പരിഹരിച്ചില്ല.ഒടുവില് താല്ക്കാലികമായി പണി നടത്തി കുറഞ്ഞ അളവിലാണ് ഇപ്പോള് വെള്ളം കടത്തിവിടുന്നത്. നിലവില് അമ്പലമുക്ക്, വയലിക്കട, മുട്ടട, പരുത്തിപ്പാറ, പാണന്വിള, പാറോട്ടുകോണം, കരിയം, നാലാഞ്ചിറ തുടങ്ങിയ പ്രദേശങ്ങളില് കുടിവെള്ളം ലഭിക്കുന്നില്ല.
