തിരുവനന്തപുരം: മൃഗശാലയിലെ ഏക പെണ് സീബ്ര സീത ചത്തു. വാര്ദ്ധക്യസഹജമായ അസുഖത്തെ തുടര്ന്ന് മൂന്ന് മാസമായി എഴുനേറ്റ് നില്ക്കാന് കഴിയാത്ത അവസ്ഥയിലായിരുന്നു. ഇന്നലെ രാവിലെ 10നായിരുന്നു സീത ചത്തത്. 25 വയസായിരുന്നു.
പൊതിവെ സീബബ്രകളുടെ ആയുര്ദൈര്ഘ്യം 22മുതല്25 വയസ് വരെയാണ്. 2002ല് തമിഴനാട്ടിലെ വണ്ടല്ലൂരില് നിന്നാണ് സീതയെ തിരുവനന്തപുരം മൃഗശാലയിലെത്തിച്ചത്. അന്ന് ഇവിടെയുണ്ടായിരുന്ന മണിയെന്ന ഏക സീബ്രയ്ക്ക് കൂട്ടായാണ് സീതയെത്തിയത്. എന്നാല് സീതയെത്തി ഒരു വര്ഷത്തിനകം മണി ചത്തു. പിന്നീട് സീത മൃഗശാലയില് തനിച്ചായി. കാല്മുട്ടുകള്ക്ക് പിടിപെട്ട വാതരോഗമാണ് സീതയെ എഴുന്നേല്ക്കാന് കഴിയാത്ത അവസ്ഥയിലാക്കിയത്. മൂന്ന് മാസമായി സന്ദര്ശകരില് നിന്ന് മാറ്റി പ്രത്യേക മുറിയില് ചികിത്സയിലായിരുന്നെങ്കിലും ഭക്ഷണം കഴിക്കുമായിരുന്നു.
ഉച്ചയ്ക്ക് രണ്ടിന് പാലോട് ചീഫ് ഡിസീസ് ഇന്വസ്റ്റിഗേഷന് ഓഫീസിലെ ഡോ. സ്വപ്നാ സൂസന് എബ്രഹാം, ഡോ. നന്ദകുമാര്. എസ് എന്നീവര് ചേര്ന്ന് സീതയുടെ പോസ്റ്റ്മോര്ട്ടം നടത്തി മ്യൂസിയം വളപ്പില് കുഴിച്ചിട്ടു. നിലവില് മൃഗശാലയിലുള്ള കടുവ, സിംഹവാലന് കുരങ്ങ്, സിംഹം എന്നിവ അവയുടെ ആയുര്ദൈഘ്യത്തിനോട് അടുത്തവയാണ്. ഈവര്ഷം തന്നെ ഇപ്പോള് ഇവിടെയില്ലാത്ത സീബ്ര, ജിറാഫ്, വെള്ള സിംഹം, എന്നീ അപൂര്വ്വ മൃഗങ്ങളെ എത്തിക്കാനുള്ള നടപടി കൈക്കൊള്ളുമെന്ന് മന്ത്രി കെ. രാജു അറിയിച്ചു. ഇതിനായി സെന്ട്രല് സൂ അതോറിറ്റിക്ക് അപേക്ഷ നല്കിയിട്ടുണ്ട്. മാര്ച്ച് 22ന് മൃഗങ്ങളെ മറ്റ് മൃഗശലകളില് നിന്ന് കൈമാറുന്ന തീരുമാനം അറിയിക്കുമെന്ന് മൃഗശാല അധികൃതര് അറിയിച്ചു.
