പാനൂര്: നല്ലൊരു നാളേക്കായി നമുക്ക് ഒത്തൊരുമിക്കാം എന്ന മുദ്രാവാക്യവുമായി കരിങ്കല് ക്വാറിക്കെതിരെ പ്രദേശവാസികള് രംഗത്ത്. കുന്നോത്ത്പറമ്പ് പഞ്ചായത്തിലെ ചേരിക്കലിലെ സി.ജി. ജോര്ജിന്റെ ഉടമസ്ഥതയിലുളള ക്വാറിക്കെതിരെയാണ് നാട്ടുകാര് സമരത്തിനിറങ്ങിയത്. ഇന്നലെ ക്വാറിയിലേക്ക് ജനകീയ മാര്ച്ചും സംഘടിപ്പിച്ചു. ജനകീയവേദി ജില്ലാസെക്രട്ടറിയും പരിസ്ഥിതി പ്രവര്ത്തകനുമായ ഇ.മനീഷ് മാര്ച്ച് ഉദ്ഘാടനം ചെയ്തു. പി.വിജയന് അദ്ധ്യക്ഷത വഹിച്ചു.
400 അടിയോളം താഴ്ചയില് ഖനനം നടന്ന ക്വാറി പ്രവര്ത്തനം പ്രദേശത്തെ കുടിവെളള ക്ഷാമം രൂക്ഷമാക്കിയിരിക്കുകയാണ്. വേനല് കടുത്തതോടെ ഖനനം നിര്ത്താന് ആവശ്യപ്പെട്ടിട്ടും കൂട്ടാക്കാത്തതിനെ തുടര്ന്നാണ് പ്രദേശത്ത് ആക്ഷന് കമ്മറ്റി രൂപീകരിച്ച് സമര പ്രഖ്യാപനം നടന്നത്. ചില രാഷ്ട്രീയ നേതാക്കളുടെ പിന്ബലത്തിലാണ് പരിസ്ഥിതിയ്ക്ക് ഏറെ ദോഷം ചെയ്യുന്നതും കുടിവെളളം മുട്ടിക്കുന്നതുമായ ക്വാറി ഇവിടെ പ്രവര്ത്തിക്കുന്നത്. കൊളവല്ലൂര് പോലീസും ക്വാറി അധികൃതരുമായി നടന്ന ചര്ച്ചയെത്തുടര്ന്ന് ജിയോളജിസ്റ്റ് സ്ഥലം സന്ദര്ശിച്ച് പരിശോധന നടത്തുന്നതുവരെ ഖനനം നിര്ത്തി വെക്കുമെന്ന ഉറപ്പിനെത്തുടര്ന്നാണ് സമരക്കാര് പിരിഞ്ഞുപോയത്. കെ.കെ.ചാത്തുക്കുട്ടി, എടച്ചോളി ഗോവിന്ദന്, സി.കെ.ലിജില്, ഒ.രജീഷ്, കെ.സി.അനീഷ് കുമാര്, നിഷാഹരി, ടി.വിമല, കെ.മഹിജ തുടങ്ങിയവര് സമരത്തിന് നേതൃത്വം നല്കി.
