ഇലന്തൂര്: ഇന്ന് ഇലന്തൂര് ഭഗവതികുന്ന് ദേവിക്ഷേത്രത്തിലെ വല്യപടേണി. കാവിലമ്മയുടെ ഏറ്റവും വലിയ കാലവഴിപാടാണ് വലിയപടേണി. കുംഭ ഭരണി നാളില് ചൂട്ടുവച്ച് പച്ചതപ്പുകൊട്ടി തുടങ്ങിയ പടേണി പൂര്ണ്ണതയില് എത്തുന്നത് എട്ടാം ദിവസമായ ഇന്നാണ്.
മുഖമറകോലങ്ങള് മുതല് രൗദ്ര ഭാവങ്ങള് നിറഞ്ഞ ഭൈരവി വരെ തപ്പുതാളത്തിനൊത്ത് ഇന്ന് ഭഗവതിയുടെ മുന്നില് നിറഞ്ഞാടും.
രാത്രി 10 മണിക്ക് തപ്പില് ജീവകൊട്ടുന്നതോടെ വല്യപടേണി ചടങ്ങുകള്ക്ക് കളമുണരും. ഇലന്തൂര് ശ്രീമഹാഗണപതി ക്ഷേത്രത്തില് നിന്നും കത്തിജ്ജവലിക്കുന്ന ചൂട്ടുവെളിച്ചത്തില് ചെണ്ടമേളത്തിന്റെയും താലപ്പൊലിയുടേയും അടവി വൃക്ഷകൊമ്പുകളുടേയും അകമ്പടിയോടെ എത്തുന്ന കോലങ്ങളെ തപ്പുമേളത്തിന്റെ മൂര്ദ്ധന്യ അവസ്ഥയില് കാപ്പൊലിച്ച് കളത്തിലേക്ക് ആനയിക്കും.
കളരിവന്ദനത്തിനുശേഷം ഉണരുന്ന കളത്തിലേക്ക് ആദ്യമെത്തുന്നത് വെളിച്ചപ്പാടാണ്. ശേഷം എല്ലാ കോലങ്ങളും ഒന്നിച്ച് ചുവടുവയ്ക്കുന്ന നിരത്തിതുള്ളല് അതിനുശേഷം പുലവൃത്തം താവടി എന്നിവയെത്തും.
ശിവകോലം കളത്തിലെത്തുന്നതോടെ പാളക്കോലങ്ങളുടെ വരവായി. ഗണപതി, മറുത, പക്ഷി, മാടന്, സുന്ദരയക്ഷി, അരക്കിയക്ഷി, അന്തരയക്ഷി, മായയക്ഷി, എരിനാഗയക്ഷി, കാലന് എന്നീകോലങ്ങള് ക്രമത്തില് തുള്ളി ഒഴിയുന്നു.
അമ്മൂമ്മ, പരദേശി, കാക്കാരിശി, എന്നീ വിനോദ രൂപങ്ങള് ചിരിക്കാനും ചിന്തിപ്പിക്കാനുമായി ഇടവേളകളില് കളത്തിലെത്തുംഅന്തകാരത്തിനുമേല് വെളിച്ചം ആധിപത്യം സ്ഥാപിക്കുന്ന സങ്കല്പത്തില് സൂര്യന് കിഴക്കുദിക്കുമ്പോള് കരദേവതയായ ഭൈരവിയും കാഞ്ഞിരമാലയും കളത്തില് തുള്ളും തുടര്ന്ന് പിഴകളെല്ലാം പൊരുക്കണെ എന്ന് കൊട്ടിപാടികൊണ്ട് അടന്ത താളത്തില് മംഗളഭൈരവി തുള്ളം , സര്വ്വ ദോഷങ്ങളും തീര്ത്ത് പൂപ്പടതുള്ളിക്കഴിഞ്ഞ് ചൂട്ടുവച്ച് വിളിച്ചിറക്കിയ കുന്നിലമ്മയെ തിരികെ ശ്രീകോവിലേക്ക് ആനയിക്കുന്നതോടെ ഈ വര്ഷത്തെ പടേനിയ്ക്ക് സമാപനമാകും.
ഭഗവതികുന്നിലമ്മയ്ക്ക് സ്വയം സമര്പ്പിക്കാന് പച്ചപ്പാളയില് രൗദ്രഭാവങ്ങള് തീര്ക്കുന്ന തിരക്കിലാണ് കരക്കാരും ശ്രീദേവി പടേനിസംഘവും. കല്ലൂപ്പാറ ശ്രീഭദ്ര പാരമ്പര്യ പടേനികോലമെഴുത്തുസംഘത്തിലെ ഇരുപതോളം കലാകരന്മാരാണ് വലിയപടേണിക്കുള്ള കോലങ്ങള് തയ്യാറാക്കുന്നത്. ഇലന്തൂര് മേക്ക് കരയാണ് ഈ വര്ഷത്തെ വല്യപടേണി കുന്നിലമ്മയ്ക്ക് സമര്പ്പിക്കുന്നത്. കഴിഞ്ഞ ഒരു വര്ഷക്കാലമായി നടന്നുവരുന്ന കാപ്പൊലി പൈതൃകോത്സവത്തിന്റെ സമാപനം കൂടിയാണ് ഈ വല്യപടേണിയോടെ നടക്കുന്നത്.
