ആലപ്പുഴ: വേനല് അവധി ആഘോഷത്തിനായി സന്ദര്ശകരെ സ്വീകരിക്കുവാന് വിജയ്പാര്ക്ക് അണിഞ്ഞൊരുങ്ങുന്നു. അവസാന നവീകരണപ്രവര്ത്തനങ്ങള് ധ്രുതഗതിയില് നടക്കുന്നു. ശുചിത്വത്തിനും സുരക്ഷിതത്വത്തിനും ഏറെ പ്രാധാന്യം നല്കിയാണ് ഇത്തവണ പദ്ധതി തയ്യാറാക്കിയിരിക്കുന്നത്. കൂടാതെ നല്ലഭക്ഷണവും നല്ലപെരുമാറ്റവും പാര്ക്കില് അവധി ആഘോഷിക്കാനെത്തുന്നവരെ കാത്തിരിക്കുന്നു.
ഗ്രീന്കാര്പെറ്റ് പദ്ധതി പ്രകാരം പാര്ക്കിന്റെ ഉള്വശം സജ്ജമാക്കുന്ന പ്രവര്ത്തനം ഉടന് ആരംഭിക്കും. വര്ഷാവസാന പരീക്ഷ കഴിയുന്നതോടെ പാര്ക്ക് ഉത്സവാന്തരീക്ഷത്തിലമരും. നിത്യേന വൈകുന്നേരങ്ങളില് രണ്ടായിരത്തിലധികം സന്ദര്ശകരാണ് ഇവിടെ എത്തുന്നത്. ഞായറാഴ്ചകളിലും മറ്റ് അവധിദിവസങ്ങളിലും ആറായിരത്തിലധികം പേര് കടല്കാണാനെത്താറുണ്ട്.
ഫോര്ഇന്വണ്, ഊഞ്ഞാല്, സര്ക്കിള്സിംഗ്, ഡീലക്സ്സിംഗ്, സ്ലൈഡറുകള്, ബാലന്സര്, മാരിഗോറൗണ്ട്, ഫെഡല്ബോട്ട് തുടങ്ങി നിരവധി വിനോദ ഉപപകരണങ്ങള് വിജയ്പാര്ക്കില് സ്ജജമാക്കിയിട്ടുണ്ട്. കൂടാതെ പാര്ക്കിന്റെ ഭാഗമായിട്ടുള്ള അമേഴ്സ് വേള്ഡിലും സന്ദര്ശകര്ക്കായി അത്യാധുനിക സംവിധാനങ്ങള് ഒരുക്കിയിട്ടുണ്ട്. കുട്ടികള്ക്ക് അഞ്ചും മുതിര്ന്നവര്ക്ക് പത്തുരൂപയുമാണ് പ്രവേശനഫീസ്.
സന്ദര്ശകര്ക്ക് ശുദ്ധമായ കുടിവെളളമൊരുക്കാന് കെയോസ്കിന് പ്ലാന്റ് സജ്ജമാക്കും. സന്ദര്ശകര് ഉപയോഗിച്ചശേഷം ഉപേക്ഷിക്കുന്ന ഭക്ഷണപ്പൊതികളും കവറുകളും പ്ലാസ്റ്റിക് ബോട്ടിലുകളും നീക്കംചെയ്യാന് കുടുംബശ്രീ പ്രവര്ത്തകരുടെ സേവനം ലഭ്യമാക്കിയിട്ടുണ്ട്. കടപ്പുറത്തെ വെളിച്ചക്കുറവ് സന്ദര്ശകരെ ബുദ്ധിമുട്ടിക്കുന്നു. കൂടാതെ വാഹനങ്ങള് പാര്ക്ക് ചെയ്യാനുളള അസൗകര്യവും സന്ദര്ശകരെ വലയ്ക്കുന്നു. സന്ദര്ശകര് ഉപേക്ഷിച്ചിട്ടുപോകുന്ന ഭക്ഷണങ്ങള് കഴിക്കാനെത്തുന്ന തെരുവ്നായ കടപ്പുറത്തെത്തുന്നവര്ക്ക് ഭീഷണിയാകുന്നു.
