പാനൂര്‍: ആരോഗ്യമന്ത്രിയുടെ മണ്ഡലത്തില്‍ ആശുപത്രിയുടെ ശോച്യാവസ്ഥ കേരളത്തിനു തന്നെ നാണക്കേടുണ്ടാക്കുന്നതാണെന്ന് ബിജെപി സംസ്ഥാന സെക്രട്ടറി വി.കെ.സജീവന്‍. പാനൂര്‍ താലൂക്ക് ആശുപത്രിയിലേക്ക് ബിജെപി കൂത്തുപറമ്പ് മണ്ഡലം കമ്മറ്റി സംഘടിപ്പിച്ച ജനകീയ മാര്‍ച്ച്് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. താലൂക്ക് ആശുപത്രിയായി ഉയര്‍ത്തിയ ഇവിടെ പ്രാഥമിക ചികിത്സയ്‌ക്കു പോലും സജ്ജീകരണമില്ല. സിപിഎം-കോണ്‍ഗ്രസ് സഹകരണത്തിലുളള തലശേരിയിലെ ആശുപത്രികളെ സഹായിക്കാന്‍ പാനൂരിലെ ആരോഗ്യകേന്ദ്രത്തെ മാറിമാറി ഭരിച്ചവര്‍ നശിപ്പിക്കുകയായിരുന്നു. ലേബര്‍ റൂമും ഓപ്പറേഷന്‍ തിയേറ്ററും അടക്കം എല്ലാ സംവിധാനങ്ങളുമുളള ആശുപത്രിയെ തകര്‍ക്കുകയായിരുന്നു യുഡിഎഫും എല്‍ഡിഎഫും. ഇതിനു പുറമെ ആകെ 36 സെന്റ് ഭൂമിയില്‍ പ്രവര്‍ത്തിക്കുന്ന ആശുപത്രിയുടെ ആറു സെന്റ് ഭൂമി പളളിക്കമ്മറ്റി കയ്യേറിയതായും പരിശോധനയില്‍ തെളിഞ്ഞിട്ടുണ്ട്. ഇതു തിരിച്ചു പിടിക്കണം. ആശുപത്രിയുടെ പേരില്‍ സ്ഥലമെടുക്കാന്‍ പണം പിരിച്ച് കീശയിലാക്കിയവരെ സമൂഹമധ്യത്തില്‍ വിചാരണ ചെയ്യണം. ഇതിനെതിരെ ശക്തമായ അന്വേഷണവും നടപടിയുമുണ്ടാവണം. അല്ലാത്തപക്ഷം വന്‍പ്രക്ഷോഭത്തിനു ബിജെപി നേതൃത്വം കൊടുക്കുമെന്നും അദ്ദേഹം തുടര്‍ന്നു പറഞ്ഞു. ബിജെപി മണ്ഡലം പ്രസിഡണ്ട് സി.കെ.കുഞ്ഞിക്കണ്ണന്‍ മാസ്റ്റര്‍ അദ്ധ്യക്ഷത വഹിച്ചു. ബിജെപി ജില്ലാ സെക്രട്ടറി എന്‍.ഹരിദാസ് പ്രസംഗിച്ചു. കെ.കെ.ധനഞ്ജയന്‍ സ്വാഗതവും രാജേഷ് കൊച്ചിയങ്ങാടി നന്ദിയും പറഞ്ഞു. പുത്തൂര്‍ റോഡില്‍ നിന്നും ആരംഭിച്ച ജനകീയ മാര്‍ച്ച് ആശുപത്രിയുടെ മുന്നില്‍ പോലീസ് തടഞ്ഞു. ആശുപത്രിയിലേക്ക് തളളിക്കയറാന്‍ ശ്രമിച്ച പ്രവര്‍ത്തകരെ പോലീസും നേതാക്കളും തടഞ്ഞു. ആര്‍എസ്എസ് ജില്ലാ സേവാ പ്രമുഖ് ടി.പി.സുരേഷ്ബാബു, താലൂക്ക് കാര്യവാഹ് എന്‍.പി.ശ്രീജേഷ്, എന്‍.ടി.മനോജ്, പി.ടി.കെ.നാണു, സി.പി.സംഗീത, കെ.കാര്‍ത്തിക, ലസിത പാലക്കല്‍, എ.ഷീബ, കെ.കെ.സനില, കെ.കെ.സുജാത, ശോഭ, പ്രേമ, കെ.സുജാത, കെ.സി.ജിയേഷ്, കെ.പി.സഞ്ജീവ്കുമാര്‍, എ.സിബിന്‍, ആര്‍.വി.ശശിധരന്‍, പി.സുധീര്‍, പത്മരാജന്‍ മാസ്റ്റര്‍, കെ.നാണു മാസ്റ്റര്‍, യു.പി.ബാബു, കെ.സുവീണ്‍ മാസ്റ്റര്‍, ജയദേവന്‍ മൊകേരി, സി.പി.പ്രമോദന്‍ തുടങ്ങിയവര്‍ നേതൃത്വം നല്‍കി.
