കുറവിലങ്ങാട്: സംസ്ഥാനബജറ്റില് ഏറെ പ്രതീക്ഷകളോടെ കാത്തിരുന്ന കുറവിലങ്ങാടിന് ബാക്കിയായത് നിരാശമാത്രം. കോഴായിലെ സയന്സ് സിറ്റി, കുറവിലങ്ങാട് താലൂക്ക് ആശുപത്രി എന്നിങ്ങനെ പ്രതീക്ഷകളുടെ വലിയ നിരയായിരുന്നു കുറവിലങ്ങാടിന്. സമീപ പഞ്ചായത്തുകളായ ഉഴവൂര്, വെളിയന്നൂര്, മരങ്ങാട്ടുപിള്ളി, കടപ്ലാമറ്റം പഞ്ചായത്തുകളുടെ സ്ഥിതിയും വ്യത്യസ്തമല്ല. ഏറെ പ്രതീക്ഷകളായിരുന്നു സംസ്ഥാനസര്ക്കാരിന്റെ ആദ്യ സമ്പൂര്ണ ബജറ്റില്. കോഴായിലെ സയന്സ് സിറ്റിയില് മുന് യുഡിഎഫ് സര്ക്കാരിന്റെ കാലത്ത് അനുവദിച്ച ഫണ്ടും കേന്ദ്രസര്ക്കാര് ഫണ്ടും വിനിയോഗിച്ചുള്ള പ്രവര്ത്തനങ്ങള് അവസാനഘട്ടത്തിലേക്ക് നീങ്ങുകയായിരുന്നു. പുതിയ ഫണ്ട് എത്തിയാല് മതിയായ പശ്ചാത്തല സൗകര്യമടക്കം ഒരുക്കാനാകുമെന്ന പ്രതീക്ഷകളിലായിരുന്നു നാട്. ആദ്യഘട്ടമായ സയന്സ് സെന്ററില് നിന്ന് സയന്സ് സിറ്റിയിലേക്കുള്ള വളര്ച്ചയിലും സര്ക്കാരിന്റെ സാമ്പത്തിക സഹായം പ്രതീക്ഷിച്ചിരുന്നുവെങ്കിലും പ്രതീക്ഷയ്ക്കപ്പുറം എങ്ങുമെത്തിയില്ല കാര്യങ്ങള്. ഉഴവൂരില് കെ.ആര് നാരായണന് ആശുപത്രിയുമായി ബന്ധപ്പെട്ട ഇടപെടലുകള് സജീവമാകുമെന്ന് കരുതിയെങ്കിലും അതുണ്ടായില്ല. എന്നാല് ഇടക്കോലിയില് നിന്ന് മെഡിക്കല് കോളജിലേക്കുള്ള റോഡ് വികസനം ഇടംതേടിയിട്ടുണ്ട്.
ഉഴവൂരില് നിന്നുള്ളവര് ഈ റോഡിനേക്കാള് നിലവിലുള്ള സൗകര്യം പ്രയോജനപ്പെടുത്താനാണ് ആഗ്രഹിക്കുന്നതെന്ന വിലയിരുത്തലുകള് ഉയര്ന്നിട്ടുമുണ്ട്.
