മട്ടന്നൂര്‍/ഇരിട്ടി: മട്ടന്നൂര്‍ മരുതായിയില്‍ വെച്ച് യുവാക്കളെ അക്രമിച്ച് പണം തട്ടിയെടുത്ത കേസില്‍ ഡിവൈഎഫ്‌ഐ നേതാവ് അറസ്റ്റില്‍. ഡിവൈഎഫ്‌ഐ ഉളിയില്‍ മേഖലാ പ്രസിഡണ്ടും സിപിഎം ചാവശ്ശേരി ലോക്കല്‍ കമ്മിറ്റി അംഗവും ഇരിട്ടി നഗരസഭാ കൗണ്‍സിലര്‍ ജലനയുടെ ഭര്‍ത്താവുമായ നടുവനാട് തലച്ചങ്ങാട്ടെ പി.പി.മനോജി(39)നെയാണ് മട്ടന്നൂര്‍ സിഐ ഷാജു ജോസഫും സംഘവും അറസ്റ്റ് ചെയ്തത്. ഈ കേസ്സിലെ രണ്ട് മുഖ്യ പ്രതികളായ മമ്പറം പൊയിനോട് കരുവാരത്ത് വീട്ടില്‍ ഹര്‍ഷാദ് (28), കീച്ചേരി ബൈത്തുല്‍റഹ്മയില്‍ സൈനുദ്ദീന്‍ (33)എന്നിവരെ കഴിഞ്ഞ ദിവസം അറസ്റ്റ് ചെയ്തിരുന്നു. ഇവരില്‍ നിന്നും ലഭിച്ച വിവരത്തിന്റെ അടിസ്ഥാനത്തിലാണ് മനോജ് അറസ്റ്റിലാവുന്നത്. പണം തട്ടിപ്പറിക്കല്‍ ആസൂത്രണം ചെയ്തതിനും കുറ്റകൃത്യങ്ങള്‍ ചെയ്യാന്‍ മറ്റുള്ളവരെ പ്രേരിപ്പിച്ചതിനുമാണ് മനോജിനെതിരെ കേസ്. കേസിലെ എട്ടാം പ്രതിയാണ് മനോജ്.
ഫെബ്രുവരി ഒന്നിനായിരുന്നു കേസ്സിനാസ്പദമായ സംഭവം നടന്നത്. പണയം വെച്ച സ്വര്‍ണ്ണാഭരണങ്ങള്‍ എടുത്തു നല്‍കുന്ന സംഘത്തെ അക്രമിച്ച് ഇവരുടെ കയ്യില്‍ ഉണ്ടായിരുന്ന പണം ഇവര്‍ തട്ടിയെടുക്കുകയായിരുന്നു. കോഴിക്കോട് ചേളന്നൂരിലെ മേലേടത്ത് മീത്തല്‍ ഇബ്രാഹീമിന്റെ മകന്‍ ഷമീറിനെയും, സുഹൃത്തായ കോഴിക്കോട് മുരിങ്ങലിലെ മിഖ് ദാദിനെയും മട്ടന്നൂരിലേക്ക് വിളിച്ച് വരുത്തി മട്ടന്നൂര്‍ ഇരിക്കൂര്‍ റോഡില്‍ മരുതായി കള്ളുഷോപ്പിനു മുന്നില്‍ വെച്ച് ഇവര്‍ അക്രമിച്ചു പണം തട്ടുകയായിരുന്നു.
പ്രതികളില്‍ ഒരാള്‍ വിളിച്ചതിനെത്തുടര്‍ന്ന് രണ്ടുപേരും പൊറോറ സര്‍വീസ് സഹകരണ ബാങ്കിന് മുന്നില്‍ എത്തുകയായിരുന്നു. ഇവര്‍ ബാങ്കിന് മുന്നില്‍ നില്‍ക്കുന്നതിനിടെ ടവേര കാറില്‍ എത്തിയ പ്രതികളുടെ സംഘം ഷമീറിനെ കുത്തി പരിക്കേല്‍പ്പിക്കുകയും മിഖ് ദാദിനെ തട്ടിക്കൊണ്ടുപോവുകയും മര്‍ദ്ദിച്ചു അവശനാക്കിയ ശേഷം കയ്യിലുണ്ടായിരുന്ന ആറു ലക്ഷത്തോളം രൂപ തട്ടിയെടുത്ത് ആളൊഴിഞ്ഞ സ്ഥലത്ത് തള്ളിയിട്ട ശേഷം കടന്നുകളയുകയുമായിരുന്നു. പ്രതികളുടെ അക്രമത്തില്‍ കുത്തേറ്റു പരിക്കുപറ്റിയിരുന്ന ഷമീര്‍ മട്ടന്നൂര്‍ പോലീസില്‍ നല്‍കിയ പരാതിയുടെ അടിസ്ഥാനത്തില്‍ പോലീസ് കേസ്സെടുത്തു നടത്തിയ അന്വേഷണത്തിലാണ് ഇപ്പോള്‍ മനോജ് അടക്കം മൂന്നുപേര്‍ അറസ്റ്റിലായത്.
ആദ്യം പിടികൂടിയ രണ്ടു പ്രതികള്‍ നല്‍കിയ വിവരത്തിന്റെ അടിസ്ഥാനത്തിലാണ് ഡിവൈഎഫ്‌ഐ നേതാവ് ഇപ്പോള്‍ അറസ്റ്റിലായിരിക്കുന്നത്. സംഭവത്തില്‍ പത്തുപേര്‍ പ്രതികളായി ഉണ്ടെന്നാണ് പോലീസ് പറയുന്നത്. ഇവരെ പിടികൂടാനുള്ള ശ്രമത്തിലാണ് പോലീസ്. തില്ലങ്കേരിയിലെ അമ്മുഅമ്മയെ ബോംബെറിഞ്ഞു കൊന്ന കേസ്സിലെ പ്രതികൂടിയാണ് അറസ്റ്റിലായ മനോജ്.
