നാഗര്കോവില്: ശിവരാത്രിയോടനുബന്ധിച്ച് ഭക്തജനങ്ങളെ സ്വീകരിക്കുവാന് കന്യാകുമാരി ജില്ലയില് വിളവങ്കോട്, കല്ക്കുളം താലുക്കുകളിലായുള്ള പന്ത്രണ്ട് ശിവാലയക്ഷേത്രങ്ങളും ഒരുങ്ങികഴിഞ്ഞു. വെള്ളിയാഴ്ചയാണ് ശിവരാത്രി. ശിവരാത്രി തലേന്ന് വൈകുന്നേരത്തോടെ തിരുമല ക്ഷേത്രത്തില് നിന്നും ശിവാലയ ഓട്ടം തുടങ്ങും. നൂറ് കിലോമീറ്റര് ചുറ്റളവില് സ്ഥിതിചെയ്യുന്ന തിരുമല, തിക്കുറിശ്ശി, തൃപ്പരപ്പ്, തിരുനന്തിക്കര, പൊന്മന, പന്നിപ്പാകം, കല്ക്കുളം, മേലാങ്കോട്, തിരുവിടയ്ക്കോട്, തിരുവിതാംകോട്, തൃപ്പന്നിയോട്, തിരുനട്ടാലം ക്ഷേത്രങ്ങളാണ് ശിവാലയ ക്ഷേത്രങ്ങള്. ശിവാലയ ക്ഷേത്രങ്ങളില് ഒരുപകലും രാത്രിയും കൊണ്ട് നടത്തുന്ന ദര്ശനക്രമമാണ് ശിവാലയ ഓട്ടം. ശിവക്ഷേത്രങ്ങളിലാണ് ദര്ശനം നടത്തുന്നതെങ്കിലും ഗോവിന്ദ ഗോപാല എന്ന വൈഷ്ണവ ജപമന്ത്രം ഉരുവിട്ടുകൊണ്ടാണ് ശിവാലയ ഓട്ടം നടത്തുന്നത്. ഭക്തിസാന്ദ്രമായ അന്തരീക്ഷത്തില് വ്യാഴാഴ്ച വൈകുന്നേരം മുഞ്ചിറ തിരുമല ശിവക്ഷേത്രത്തില് നിന്നും തുടങ്ങുന്ന യാത്ര ശിവരാത്രി ദിവസമായ വെള്ളിയാഴ്ച തിരുനട്ടാലം ക്ഷേത്രത്തില് എത്തിച്ചേരുന്നതോടെ ശിവാലയ ഓട്ടം സമാപിക്കും.
പന്ത്രണ്ട് ശിവക്ഷേത്രങ്ങലിലും പരമശിവന്റെ പന്ത്രണ്ട് ഭാവങ്ങളിലുള്ള പ്രതിഷ്ഠകളാണുള്ളത്. തിരുമല ക്ഷേത്രത്തില് ശൂലപാണിയായ മഹാദേവനും ചക്രപാണിയായ മാഹാവിഷ്ണുവും, തൃപ്പരപ്പില് ജഡാധരനും തിക്കുറിശിയില് മഹാദേവനും തിരുനന്തിക്കരയില് നന്ദികേശ്വരനും പൊന്മനയില് തിമ്പിലേശ്വരനും പന്നിപ്പാകത്ത് കിരാതമൂര്ത്തിയും കല്ക്കുളത്ത് നീലകണ്ഠസ്വാമിയും മേലാങ്കോട്ട് കാലഭൈരവനും തിരുവിടയ്ക്കോട്ട് ജഡയപ്പനും തിരുവിതാംക്കോട്ട് പരിതപാണിയും തൃപ്പന്നിയോട്ട് ഭക്തവത്സലനുംതിരുനട്ടാലത്ത് ശൈവ-വിഷ്ണു പ്രതിഷ്ഠകളുള്ള ശങ്കരനാരായണനുമാണുള്ളത്.
ശിവാലയ ഓട്ടത്തിന് ജില്ലയില് നിന്നും അയല് സംസ്ഥാനമായ കേരളത്തില്നിന്നും കാല്നടയായും വാഹനങ്ങളിലും ലക്ഷങ്ങളാണ് എത്തിച്ചേരുന്നത്. ഇതുകാരണം ശിവാലയക്ഷേത്രങ്ങള് സ്ഥിതിചെയ്യുന്ന സ്ഥലങ്ങളില് വന്തിരക്കാണ് പതിവായി അനുഭവപ്പെടാറുള്ളത്. ഒറ്റ ദിവസം കൊണ്ടുതന്നെ ദേവസ്വംവകുപ്പിന് കോടികളുടെ വരുമാനം ലഭിക്കുന്നുവെങ്കിലും ഭക്തര്ക്ക് വേണ്ട സൗകര്യം ലഭ്യമാക്കുന്ന കാര്യത്തില് ഏറെ പിന്നിലാണ്. റോഡുകള് അറ്റകുറ്റപണി ചെയ്യാത്തതും തെരുവുവിളക്കുകള് കത്താത്തതും കാരണം കാല്നട യാത്ര വളരെ ബുദ്ധിമുട്ടാണ്. ക്ഷേത്രങ്ങളിലെത്തുന്ന ഭക്തര്ക്ക് കൂടിവെള്ളവും മറ്റ് സൗകര്യങ്ങളും ലഭ്യമാക്കുന്നത് പൂര്ണ്ണമായും ഹിന്ദുമുന്നണി, ആര്എസ്എസ് തുടങ്ങിയ സംഘടനകള് മാത്രമാണ്. ശിവരാത്രിയോടനുബന്ധിച്ച് കന്യാകുമാരി ജില്ലയ്ക്ക് ജില്ലാഭരണകൂടം പ്രാദേശിക അവധി പ്രഖ്യാപിച്ചിട്ടുണ്ട്.
