അരൂര്: തീരദേശ റയില്പാത ഇരട്ടിപ്പിക്കല് പൂര്ത്തിയാക്കുന്നതിന് ഇനിയും വര്ഷങ്ങളോളം കാത്തിരിക്കേണ്ടി വരുമെന്ന സൂചന . എറണാകുളം സൗത്ത് മുതല് കുമ്പളം, അരൂര്, എഴുപുന്ന, തുറവൂര്, ചേര്ത്തല, മാരാരിക്കുളം, ആലപ്പുഴ, അമ്പലപ്പുഴ, ഹരിപ്പാട്, കായംകുളം തുടങ്ങിയ മേഖലകള് ഉള്പ്പെട്ടതാണ് ഇപ്പോഴത്തെ തീരദേശ റയില്പ്പാത.
ഈ പാതയില് ഏകേദശം ഒരു കിലോ മീറ്ററിലധികം വരുന്ന ഒരേ ഒരു പാലമാണ് അരൂര്-കുമ്പളം റയില്പാലം. നിലവില് ഇവിടെ പാലം ഉണ്ടെങ്കിലും ഇത് ഒറ്റവരി പാതയുള്ള പാലമാണ്. ഇരട്ടപാതയാക്കണമെന്നങ്കില് മറ്റൊരു പാലംകൂടി നിര്മ്മിച്ചാല് മാത്രമേ അതിന് സാദ്ധ്യമാവുകയുള്ളു. പാത ഇരട്ടിപ്പിക്കലിന്റെ ഭാഗമായി മണ്ണു പരിശോധനയും എസ്റ്റിമേറ്റ് തയ്യാറാക്കലും എല്ലാം പൂര്ത്തീകരിക്കപ്പെടുകയും ചെയ്തിട്ടുണ്ട്.
എന്നാല് ഇതുവരേയും എസ്റ്റിമേറ്റ് അംഗീകരിക്കുവാന് റയില്വേ തയ്യാറായിട്ടില്ല. ഇക്കാരണം കൊണ്ടുതന്നെ പാലം നിര്മ്മാണവും അനിശ്ചിതത്വത്തിലേക്ക് നീങ്ങികൊണ്ടിരിക്കുകയാണ്. എസ്റ്റിമേറ്റ് അംഗീകരിച്ച് പാലം നിര്മ്മാണം ആരംഭിച്ചാല് കുറഞ്ഞത് ഇനിയും രണ്ടുവര്ഷക്കാലത്തോളം പാലം നിര്മ്മാണം പൂര്ത്തീകരിക്കുന്നതിന് വേണ്ടി വരുമെന്ന് ചൂണ്ടികാണിക്കപ്പെടുന്നു.
കൂടാതെ ലക്ഷങ്ങള് ചിലവഴിച്ച് മണ്ണു പരിശോധന നടത്തിയതും വ്യഥാവിലാകുമെന്ന് പറയപ്പെടുന്നു. ഇതിനായി ഇനിയും മറ്റൊരു എസ്റ്റിമേറ്റ് തയ്യാറാക്കി അനുമതിക്കായി കാത്തിരിക്കേണ്ടി വരും. കായംകുളം ഭാഗത്തു നിന്നും വടക്കോട്ട് പാത ഇരട്ടിപ്പിക്കുന്ന ജോലി ധൃതഗതിയില് നടക്കുന്നുണ്ട്. എന്നാല് ഇതിന്റെ പൂര്ണ്ണ പ്രയോചനം ലഭ്യമാക്കണമെങ്കില് അരൂര് കുമ്പളം പാലം പൂര്ത്തീകരണം അനിവാര്യമാണ്.
അമ്പലപ്പുഴ-തുറവൂര്, തുറവൂര്-കുമ്പളം എന്നീ റീച്ചുകള്ക്കും ഇതു വരെ അംഗീകാരം ലഭിച്ചിട്ടില്ല. നാന്നൂറ്റി എഴുപത് കോടി രൂപ ആലപ്പുഴ ജില്ലക്ക് മാത്രമായി അനുവദിച്ചിട്ടുണ്ട്. എന്നാല് ഈ തുക വിട്ടു കിട്ടുന്നതിനുള്ള നടപടികള് പോലും ആരംഭിച്ചിട്ടില്ല. അമ്പലപ്പുഴ-തുറവൂര്, തുറവൂര്-കുമ്പളം എന്നീ റീച്ചുകള്ക്ക് അംഗീകാരം ലഭിക്കാത്തതു മൂലം തീരദേശ പാതയുടെ ഇരട്ടിപ്പിക്കല് അമ്പലപ്പുഴ വരെ ഒരുക്കി നിര്ത്തിയിരിക്കുകയാണ്.
