തിരുവല്ല : പൊയ്കയില് ശ്രീകുമാരഗുരുദേവന്റെ 139-ാം ജന്മദിനാഘോഷത്തിന് പി.ആര്.ഡി.എസ്സ് ആസ്ഥാനമായ ഇരവിപേരൂര് ശ്രീകുമാര് നഗറില് കൊടിയേറി.
രാവിലെ 9ന് ശ്രീകുമാര ഗുരുദേവ മണ്ഡപത്തിലെ പ്രത്യേക പ്രാര്ത്ഥനയ്ക്കുശേഷം സഭാ പ്രസിഡന്റ് വൈ. സദാശിവന് കൊടിയേറ്റു കര്മ്മം നിര്വ്വഹിച്ചു. തുടര്ന്ന് അടിമസ്മാരക സ്തംഭത്തില് പുഷ്പാര്ച്ചനയും പ്രത്യേക പ്രാര്ത്ഥനയും നടന്നു.
ഉച്ചകഴിഞ്ഞ് എട്ടുകരയുടെ ആഭിമുഖ്യത്തില് എട്ടുകരസംഗമം നടന്നു. 4ന് പൊയ്കയില് ളേച്ചിമാതാ സന്നിധാനത്തുനിന്നുമാരംഭിച്ച പൊയ്ക പ്രദക്ഷിണം ശ്രീകുമാരഗുരുദേവ മണ്ഡപത്തില് എത്തിച്ചേര്ന്നു. രാത്രി 8ന് ഗുരുകുല ഉപശ്രേഷ്ഠന് കെ.ആര്.സോമന്റെ അദ്ധ്യക്ഷതയില് ചേര്ന്ന എട്ടുകര സമ്മേളനം സഭാ പ്രസിഡന്റ് വൈ. സദാശിവന് ഉദ്ഘാടനം ചെയ്തു. ഗുരുകുലശ്രേഷ്ഠന് ഇ.റ്റി.രാമന് അനുഗ്രഹപ്രഭാഷണവും സഭാ വൈസ്പ്രസിഡന്റ് എം.എസ്. കുട്ടപ്പന് മുഖ്യപ്രഭാഷണവും നടത്തി.
