ആലപ്പുഴ: സര്ക്കാര് നടപ്പാക്കുന്ന ജനോപകാരപ്രദമായ പദ്ധതികള് നടപ്പാക്കുന്നതില് ജനപ്രതിനിധികള് വീഴ്ച വരുത്തിയാല് ജനങ്ങള് പാഠം പഠിപ്പിക്കുമെന്ന് പൊതുമരാമത്ത് മന്ത്രി ജി. സുധാകരന് പറഞ്ഞു. ജില്ലയിലെ നഗരങ്ങളില് നടപ്പാക്കുന്ന വെളിയിട വിസര്ജ്ജന വിമുക്ത പദ്ധതി (ഒഡിഎഫ്) അവലോകനം ചെയ്യാനായി കളക്ടറേറ്റില് കൂടിയ യോഗത്തില് ആധ്യക്ഷ്യം വഹിക്കുകയായിരുന്നു അദ്ദേഹം.
ഒഡിഎഫ് പദ്ധതി നിര്വഹണത്തില് ആലപ്പുഴ നഗരസഭയുടെ പുരോഗതി ആറു ശതമാനമാണ്. നഗരസഭയില് 448 കക്കൂസുകളാണ് നിര്മിക്കേണ്ടത്. ഇതില് 25 എണ്ണം മാത്രമാണ് പൂര്ത്തീകരിച്ചത്. 423 കക്കൂസുകളുടെ നിര്മാണം പുരോഗതിയിലാണെന്ന് നഗരസഭ സെക്രട്ടറി പറഞ്ഞു. ഡിസംബര് അവസാനത്തോടെയാണ് പ്രവൃത്തികള് ആരംഭിച്ചതെന്നും രണ്ടാം ഗഡു നല്കാനുള്ള നടപടിയായതായും സെക്രട്ടറി പറഞ്ഞു.
ചേര്ത്തലയില് 83 ശതമാനം പൂര്ത്തീകരിച്ചുകഴിഞ്ഞു. ഹരിപ്പാട്, ചെങ്ങന്നൂര്, മാവേലിക്കര നഗരസഭകള് 100 ശതമാനമെന്ന നേട്ടം കൈവരിച്ചു. കായംകുളവും ഉടന് നേട്ടം കൈവരിക്കും. നഗരസഭകളില് ഒഡിഎഫ് പദ്ധതി പ്രകാരം ആകെ 1742 കക്കൂസുകളാണ് നിര്മിക്കേണ്ടത്. 1129 കക്കൂസുകളുടെ നിര്മാണം പൂര്ത്തീകരിച്ചു കഴിഞ്ഞു. നഗരസഭകളിലെ കക്കൂസുകള് ഇല്ലാത്ത എല്ലാം കുടുംബങ്ങള്ക്കും കക്കൂസ് ലഭ്യമാക്കുക, തുറന്ന കക്കൂസ് ഒഴിവാക്കുക തുടങ്ങിയ ലക്ഷ്യത്തോടെ സ്വച്ച് ഭാരത് മിഷന് (അര്ബന്) കേന്ദ്ര നഗരവികസന കാര്യ മന്ത്രാലയത്തിലെ നിബന്ധനകള് പ്രകാരമാണ് പദ്ധതി നടപ്പാക്കുന്നത്. 15,400 രൂപയാണ് പദ്ധതി വിഹിതമായി ഗുണഭോക്താവിന് ലഭിക്കുന്നത്.
