കൊച്ചി: മദ്യപിച്ചതിന് പോലീസ് സ്റ്റേഷനില് ഉടുവസ്ത്രമില്ലാതെ നിര്ത്തിയെന്ന് പരാതി. പോലീസ് കംപ്ലൈന്റ് അതോറിറ്റി ചെയര്മാന് ഇടപെട്ടപ്പോഴാണ് കസ്റ്റഡിലായിരുന്നവരെ വിട്ടത്. സൗത്ത് പോലീസ് സ്റ്റേഷനില് ജനപ്രതിനിധികള് കുത്തിയിരുന്നു പ്രതിഷേധിച്ചു. സംഭവത്തെക്കുറിച്ച് തൃക്കാക്കര അസിസ്റ്റന്റ് കമ്മീഷണര് അന്വേഷിക്കും. അതുവരെ സൗത്ത് സ്റ്റേഷന് എസ്ഐ: എ.സി. വിപിനെ സ്റ്റേഷന് മാറ്റി.
മദ്യപിച്ചെന്നാരോപിച്ച് കസ്റ്റഡിയിലെടുത്ത യുവാക്കളെ അടിവസ്ത്രം മാത്രം ധരിപ്പിച്ച് ലോക്കപ്പില് അടച്ചതാണ് വിവാദമായത്. ശനിയാഴ്ച രാത്രി പത്തരയോടെ കൊച്ചുകടവന്ത്രയ്ക്കു സമീപമാണ് കാറില് സഞ്ചരിച്ചിരുന്നവരെ പോലീസ് കസ്റ്റഡിയിലെടുത്തത്. കാറില് മൂന്നു യുവാക്കള് മദ്യപിച്ചിരുന്നു എന്ന സംശയത്തില് സൗത്ത് എസ്ഐ: എ.സി. വിപിന്റെ നേതൃത്വത്തിലുള്ള പോലീസ് സംഘം പരിശോധിച്ചു. കാറോടിച്ചയാള് മദ്യപിച്ചിട്ടില്ലായിരുന്നു. യുവാക്കള് പോലീസുമായി തര്ക്കത്തിലായി. തുടര്ന്ന്, പൊതു സ്ഥലത്ത് മദ്യപിച്ചെന്ന കുറ്റം ചുമത്തി മൂവരെയും കസ്റ്റഡിയിലെടുത്ത് സ്റ്റേഷനില് കൊണ്ടുപോയി.
വൈദ്യപരിശോധനയ്ക്കെന്നാണു പറഞ്ഞതെങ്കിലും സ്റ്റേഷനിലെത്തിച്ച് വസ്ത്രങ്ങളുരിഞ്ഞ് ലോക്കപ്പില് അടയ്ക്കുകയായിരുന്നു. ഇതിനിടെ സംഭവമറിഞ്ഞെത്തിയ ഹൈബി ഈഡന് എംഎല്എയുടെ നേതൃത്വത്തില് യൂത്ത് കോണ്ഗ്രസ് പ്രവര്ത്തകര് സ്റ്റേഷനില് കുത്തിയിരുന്ന് പ്രതിഷേധിച്ചു. സിറ്റി പൊലീസ് കമ്മിഷണര് ഉള്പ്പെടെയുള്ള ഉന്നത ഉദ്യോഗസ്ഥര് ഇടപെട്ടു. പോലീസ് കംപ്ലൈന്റ് അതോറിറ്റി ചെയര്മാന് ജസ്റ്റിസ് കെ. നാരായണക്കുറുപ്പ് പരിശോധനയ്ക്ക് എത്തിയതോടെ തിടുക്കത്തില് പൊലീസുകാര് ഇവര്ക്ക് വസ്ത്രങ്ങള് തിരികെ നല്കി. വൈദ്യപരിശോധന നടത്തി നിയമപ്രകാരം മാത്രം നടപടി കൈക്കൊള്ളാന് ജസ്റ്റിസ് നാരായണക്കുറുപ്പ് നിര്ദ്ദേശിച്ചു. യുവാക്കളെ സ്റ്റേഷന് ജാമ്യത്തില് വിടുകയും ചെയ്തു.
