തിരുവനന്തപുരം: സമൂഹത്തിലെ തിന്മകള്ക്കെതിരെ പ്രവര്ത്തിക്കാനും ധര്മ്മം സംരക്ഷിക്കാനുമുള്ള ഉപകരണങ്ങളാണ് ക്ഷേത്രങ്ങളെന്ന് ഒ. രാജഗോപാല് എംഎല്എ. തിരുവനന്തപുരം പൂജപ്പുര മൈതാനിയില് നാലു ദിവസമായി നടന്നുവന്ന ഹിന്ദു സ്പിരിച്വല് ആന്ഡ് സര്വ്വീസ് ഫെയറിന്റെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മുന്കാലങ്ങളില് മതം ശാസ്ത്രത്തിന് നിരക്കാത്തവയാണെന്നും ക്ഷേത്രങ്ങള് തകര്ക്കപ്പെടാനുള്ളവയാണെന്നുമുള്ള ആഹ്വാനങ്ങളാണ് പല ഉന്നത സ്ഥാനങ്ങളിലിരിക്കുന്നവരും നല്കിയിരുന്നത്. എന്നാല് ഇന്ന് പഴയ സാഹചര്യങ്ങള്ക്ക് മാറ്റം സംഭവിച്ചുകൊണ്ടിരിക്കുകയാണ്. ക്ഷേത്രങ്ങളുടെയും വിശ്വാസികളുടെയും എണ്ണത്തില് വര്ദ്ധനവുണ്ടായിരിക്കുന്നു. സമൂഹത്തില് ആരോഗ്യപരമായ മാറ്റം സൃഷ്ടിക്കപ്പെട്ടിരിക്കുന്നു. ക്ഷേത്രങ്ങള് സനാതന ധര്മ്മത്തിന്റെ സന്ദേശം അനുഷ്ഠിക്കാന് പ്രേരണ നല്കുന്ന കേന്ദ്രമായിരിക്കണമെന്നും അദ്ദേഹം പറഞ്ഞു.
ഉത്സവങ്ങളുടെ ആര്ഭാടങ്ങള് ഒഴിവാക്കി ക്ഷേത്രങ്ങള് വിദ്യാഭ്യസ കേന്ദ്രത്തിന്റെ കടമ നിര്വ്വഹിക്കേണ്ട സാഹചര്യം ഉരുതിരിഞ്ഞിരിക്കുന്നു. വിദ്യാഭ്യാസ രംഗം ഒരു വിഭാഗം കയ്യടക്കിവച്ചിരിക്കുകയാണ്. നമ്മുടെ കുട്ടികള് പിന്തുടരുന്ന വിദ്യാഭ്യസ പദ്ധതി ബ്രിട്ടീഷുകാരുടെതാണ്. ഇതിന് ആരെങ്കിലും മാറ്റം വരുത്താന് ശ്രമിച്ചാല് കാവി വത്കരണമെന്ന പ്രചാരണം നടത്തുന്നു. നമ്മുടെ സംസ്കാരം കുട്ടികളിലേക്ക് പകരണമെങ്കില് ആരാധനാലയങ്ങള് വിദ്യാലയങ്ങളുടെ ചുമതല വഹിക്കണമെന്നും രാജഗോപാല് വ്യക്തമാക്കി.
മഹത്വ്യക്തികളെ ആദരിക്കുന്ന ചടങ്ങില് കാനായി കുഞ്ഞിരാമന്, പി. നാരായണകുപ്പ്, വാസുദേവന് പോറ്റി, സുകുമാര്, എം.കെ. ഭാസി, ജസ്റ്റിസ് ശ്രീദേവി, കേരളാ പോലീസ് സീനിയര് സിവില് ഓഫീസര് ഹരീഷ് തുടങ്ങിയവരെ പൊന്നാടയും ഫലകവും നല്കി ആദരിച്ചു. ഹിന്ദു സ്പിരിച്വല് ആന്ഡ് സര്വ്വീസ് ഫെയറിന്റെ കേരളാ ചാപ്റ്ററിന്റെ ജനറല് കണ്വീനിയര് രഞ്ജിത്ത് കാര്ത്തികേയന് അദ്ധ്യക്ഷത വഹിച്ചു. വിജയകൃഷ്ണന് സ്വാഗതം പറഞ്ഞു.
