ചെമ്പേരി: രാഷ്ട്രീയ ചേരിതിരുവുകളും മതസ്പര്ദ്ദയും രാജ്യത്ത് അക്രമങ്ങള്ക്കും അസമാധാനത്തിനും കാരണമായി തീര്ന്നിരിക്കുകയാണെന്ന് സിനിമാതാരം ശ്രീനിവാസന് അഭിപ്രായപ്പെട്ടു. മതവും രാഷ്ട്രീയവുമില്ലാത്ത ഒരു ജീവതമാണ് താനാഗ്രഹിക്കുന്നത്. ചെമ്പേരിയില് ഒരു സിനിമാ ഷൂട്ടിങ്ങിനായെത്തിയ ശ്രീനിവാസന് മാധ്യമ പ്രവര്ത്തകരോട് സംസാരിക്കുകയായിരുന്നു. പുതിയ തലമുറ കൃഷിയെ അവഗണിച്ചുവരുന്നതായാണ് കാണുന്നതെന്നും ഇത് വന് പ്രതിസന്ധിക്ക് കാരണമാകുമെന്നും അദ്ദേഹം അഭിപ്രായപ്പെട്ടു. കുടിയേറ്റ കര്ഷകരാണ് മലബാറിലെ തദ്ദേശീയ ജനസമൂഹത്തിന് കൃഷിയുടെയും അധ്വാനത്തിന്റെയും മഹത്വമെന്തെന്ന് കാണിച്ചുകൊടുത്തത്. ഏറെ കഷ്ടപ്പാടുകള് സഹിച്ച് മലയോര മേഖലയില് കഠിനാധ്വാനത്തിലൂടെ സമ്പത്തുണ്ടാക്കാനും പ്രതിസന്ധികളെ മനക്കരുത്തുകൊണ്ട് മറികടന്ന് ജീവിതവിജയം കഴിയാന് കഴിയുമെന്നും തെളിയിച്ചവരാണ് കുടിയേറ്റ ജനത. ‘പവിയേട്ടന്റെ മധുരച്ചൂരല്’എന്ന സിനിമയുടെ ചിത്രീകരണത്തിനാണ് ശ്രീനിവാസന് ചെമ്പേരിയിലെത്തിയത്.
സങ്കുചിതമായ രാഷ്ട്രീയ ലക്ഷ്യങ്ങളോടെ മാറിമാറി ഭരണം നടത്തുന്നവര് കാലങ്ങളായി ജനങ്ങളെ കബളിപ്പിച്ചുകൊണ്ടിരിക്കുകയാണ്. രാജ്യത്തെ പ്രജകളുടെ ഭാവി സുരക്ഷിതവും ക്ഷേമകരവമായി നിലനിര്ത്തുവാന് ബുദ്ധിയുള്ള ഭരണാധികാരികള് ഉണ്ടാവേണ്ടത് അത്യാവശ്യമാണെന്നും അദ്ദേഹം പറഞ്ഞു. പ്രകൃതിയെ പരമാവധി സംരക്ഷിച്ചും ജൈവകൃഷി രീതി വ്യാപകമാക്കിയും ഇനിയെങ്കിലും മുന്നോട്ടു പോയെങ്കിലേ വരും തലമുറക്ക് ആരോഗ്യകരമായ ജീവിതം സാധ്യമായിത്തീരുകയുള്ളൂവെന്നും ശ്രീനിവാസന് ഓര്മ്മപ്പെടുത്തി. ഗ്രാമീണ മേഖലയിലുള്ള അധ്യാപക ദമ്പതികള് പ്രധാന കഥാപാത്രങ്ങളാകുന്ന ചെമ്പേരിയിലും പരിസര പ്രദേശങ്ങളായ മണ്ണംകുണ്ട്, പുറഞ്ഞാണ്, പുലിക്കുരുമ്പ, വേങ്കുന്ന്, കൂവേരി എന്നിവിടങ്ങളിലായി ചിത്രീകരിച്ചുകൊണ്ടിരിക്കുന്നത്.
ശ്രീനിവാസന് നായകനായ ചിത്രത്തില് ലനയാണ് നായിക. തളിപ്പറമ്പ് സ്വദേശികളായ ശ്രീകൃഷ്ണന്, സുധീര് തുടങ്ങിയവരാണ് സിനിമയുടെ അണിയറപ്രവര്ത്തകര്.
