കണ്ണൂര്: പിഡബ്ല്യുഡി അധികൃതരുടെ അനാസ്ഥ കാരണം നഷ്ടപെട്ട സ്വന്തം സ്ഥലം തിരിച്ചുലഭിക്കുന്നതിന് വേണ്ടി നിരവധി തവണ അപേക്ഷനല്കിയിട്ടും 20 വര്ഷത്തോളമായി അധികൃതര് അനുകൂല നടപടി സ്വീകരിച്ചില്ലെന്ന് പരാതി. മാട്ടൂലിലെ തനിമയില് കെ.സൈനബയാണ് പരാതിക്കാരി. പ്രശ്നത്തിന് ഇനിയും പരിഹാരമായില്ലെങ്കില് നിരാഹാരസമരം നടത്തുമെന്നും സൈനബയുടെ സഹോദരന് അബ്ദുള് റഷീദ്, ഭര്തൃ പിതാവ് ഹസ്സന്കുഞ്ഞി എന്നിവര് വാര്ത്താസമ്മേളനത്തില് അറിയിച്ചു. 1967ലാണ് സൈനബയുടെ ഭര്ത്താവ് പി.അബ്ദുറഹിമാന്റെ പേരിലുള്ള 7.25 സെന്റ് സ്ഥലം മാടായി മാട്ടൂല് പിഡബ്ല്യുഡി റോഡിന് വേണ്ടി അക്വയര് ചെയ്തത്. ഇതിന് പകരം യാതൊരു പ്രതിഫലവും സൈനബയോ ഭര്ത്താവോ കൈപറ്റിയിരുന്നില്ല. ഭര്ത്താവ് ഇന്തോനേഷ്യയില് ജോലി ചെയ്തുകൊണ്ടിരിക്കുമ്പോഴാണ് അന്ന് സ്ഥലം അക്വയര് ചെയ്തത്. എന്നാല് വര്ഷങ്ങള്ക്ക് ശേഷം വീട് നിര്മാണവുമായി ബന്ധപ്പെട്ട് തൊട്ടടുത്തുള്ള സ്ഥലം അളക്കാന് ചെന്നപ്പോഴാണ് പിഡബ്ല്യുഡി റോഡിന് വേണ്ടി അക്വയര് ചെയ്ത സ്ഥലത്തിന് പകരം അതേ സ്ഥലത്തിന്റെ കിഴക്കുഭാഗത്തുള്ള ആറര സെന്റ് സ്ഥലമാണ് പിഡബ്ല്യുഡി അധികൃതര് മാട്ടൂല് റോഡിന് വേണ്ടി ഏറ്റെടുത്തതെന്ന് മനസ്സിലായത്. ഇത് പിഡബ്ല്യുഡി അധികൃതരെ ബോധ്യപ്പെടുത്തുകയും ഉദ്യോഗസ്ഥര് അന്വേഷണം നടത്തി തെറ്റ് മനസ്സിലാക്കുകയും ചെയ്തു. തുടര്ന്ന് ബന്ധപ്പെട്ട ഉദ്യോഗസ്ഥര്ക്കും കലക്ടര്ക്കും ഇത് സംബന്ധിച്ച് അപേക്ഷ നല്കുകയും ചെയ്തു. യുഡിഎഫ് സര്ക്കാരിന്റെ കാലത്ത് മുഖ്യമന്ത്രി ഉമ്മന്ചാണ്ടിയുടെ ജനസമ്പര്ക്ക പരിപാടിയിലും പരാതി നല്കി. ഇതേ തുടര്ന്ന് ഉടന് തന്നെ ഭൂമി തിരിച്ച് ലഭ്യമാക്കാനുള്ള നടപടി സ്വീകരിക്കുമെന്ന് പറഞ്ഞുവെങ്കിലും ഇത് വരെ നടപ്പിലായിട്ടില്ല. ഇപ്പോഴത്തെ മുഖ്യമന്ത്രി പിണറായി വിജയനും ഇത് സംബന്ധിച്ച് പരാതി നല്കിയിട്ടുണ്ട്.
പിഡബ്ല്യൂഡി അധികൃതരുടെ അനാസ്ഥ 20 വര്ഷമായിട്ടും സ്വന്തം ഭൂമി തിരികെ ലഭിച്ചില്ലെന്ന് പരാതി
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.