തിരുവനന്തപുരം: ലോ അക്കാദമി ഭൂമി കൈയേറിയ സംഭവത്തില് അന്വേഷണം പ്രഖ്യാപിച്ചു.റവന്യൂ സെക്രട്ടറിക്കാണ് അന്വേഷണ ചുമതല.
ലോ അക്കാദമി സര്ക്കാര് ഭൂമിയാണോ, സര്ക്കാര് ഭൂമി ദുരുപയോഗം ചെയ്തിട്ടുണ്ടോ, സ്വകാര്യ ആവശ്യത്തിനായി ഭൂമിയില് കെട്ടിടങ്ങള് നിര്മിച്ചിട്ടുണ്ടോ എന്നീ വിഷയങ്ങള് പരിശോധിച്ച് അടിയന്തരമായി റിപ്പോര്ട്ട് സമര്പ്പിക്കാന് റവന്യൂ മന്ത്രി നിര്ദേശം നല്കി.
ഭൂമി അനുവദിച്ചത് സംബന്ധിച്ച് അന്വേഷണം വേണമെന്നാവശ്യപ്പെട്ട് ബിജെപി ദേശീയ കൗണ്സില് അംഗം വി.മുരളീധരനും ഭരണപരിഷ്കാര കമ്മിഷന് ചെയര്മാന് വി.എസ്.അച്യുതാനന്ദനും നല്കിയ കത്തിന്റെ അടിസ്ഥാനത്തിലാണ് ഉത്തരവ്.
1967ലാണ് തിരുവനന്തപുരത്ത് സംസ്ഥാനത്തെ ആദ്യത്തെ സ്വാശ്രയ നിയമ വിദ്യാഭ്യാസ സ്ഥാപനമായ കേരള ലോ അക്കാദമി സ്ഥാപിക്കപ്പെട്ടത്. പേരൂര്ക്കടയില് സര്ക്കാര് പാട്ടത്തിനു നല്കിയ 11 ഏക്കര് 49 സെന്റ് സ്ഥലത്ത് പ്രവര്ത്തനം ആരംഭിച്ചു. ചട്ടപ്രകാരം മൂന്ന് ഏക്കര് ഭൂമി മതി കോളേജിന്. എന്നാല് പതിനൊന്ന് ഏക്കര് നാരായണന് നായര് കൈവശം വച്ചിരിക്കുന്നു. ഇതില് എട്ട് ഏക്കറോളം ഭൂമിയില് നാരായണന് നായരുടെ വീടാണ്. ഇതിനോട് ചേര്ന്ന് കോലിയക്കോട് കൃഷ്ണന് നായര്ക്കും വീടുണ്ട്.
