കൊച്ചി: കയ്യേറിയ പുറമ്പോക്കു ഭൂമിയും ജലസ്രോതസ്സുകളും തിരിച്ചെടുക്കുമെന്ന് ജില്ലാ വികസനസമിതി. കര്ശനനടപടികള്ക്ക് തഹസീല്ദാര്മാരെയും വില്ലേജ് ഓഫീസര്മാരെയും യോഗം ചുമതലപ്പെടുത്തി. കളക്ടര് മുഹമ്മദ് വൈ. സഫീറുള്ളയുടെ അധ്യക്ഷതയില് ചേര്ന്ന യോഗത്തിലാണ് തീരുമാനം. തോടുകള്, പുഴകള്, പൊതുസ്ഥലങ്ങള് എന്നിവ സംരക്ഷിക്കാന് ജനപ്രതിനിധികളെ ഉള്പ്പെടുത്തി സംരക്ഷണസമിതിയുണ്ടാക്കും.
എന്പിഒഎല് മുതല് തൂതിയൂര് വരെ ഇടപ്പള്ളി കനാലുമായി ബന്ധപ്പെട്ട കയ്യേറ്റങ്ങള് ഉടന് ഒഴിപ്പിക്കാന് സര്വേ നടത്തും. പൊന്നുരുന്നിയില് സ്വകാര്യവ്യക്തിയുടെ ഭൂമിയില് 96 വര്ഷമായി പ്രവര്ത്തിച്ചിരുന്ന മാര്ക്കറ്റ് പുറമ്പോക്ക് ഭൂമി അളന്ന് തിട്ടപ്പെടുത്താനും തഹസീല്ദാരെ നിയോഗിച്ചു. ജലസ്രോതസ്സുകള് മലിനമാക്കുന്നത് തടയാന് കര്ശനനടപടികള് സ്വീകരിക്കും.
കുടിവെള്ളത്തിനായി ജില്ലയിലെ ജനങ്ങള് പ്രധാനമായും ആശ്രയിക്കുന്ന പെരിയാറും മൂവാറ്റുപുഴയാറും ജൈവ വൈവിധ്യമേഖലയായി പ്രഖ്യാപിക്കാന് ജില്ലാ വികസനസമിതി ശുപാര്ശ ചെയ്തു. യോഗത്തില് എംഎല്എമാരായ എല്ദോ എബ്രഹാം, അനൂപ് ജേക്കബ്, റോജി എം ജോണ്, ജോണ് ഫെര്ണാണ്ടസ്, പി.ടി. തോമസ്, വി.പി. സജീന്ദ്രന്, പിറവം നഗരസഭാ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്മാന് ജില്സ് പെരിയപ്പുറം തുടങ്ങിയവര് വിവിധ പ്രശ്നങ്ങള് ചൂണ്ടിക്കാട്ടി.
തദ്ദേശസ്വയംഭരണസ്ഥാപനങ്ങളില് ശാസ്ത്രീയമായ അറവുശാലകളും സ്വീവേജ് ട്രീറ്റ്മെന്റ് പ്ലാന്റുകളും കാര്യക്ഷമമായി നടപ്പിലാക്കണമെന്ന് എംഎല്എമാര് യോഗത്തില് ആവശ്യപ്പെട്ടു. കുടിവെള്ളക്ഷാമം അനുഭവിക്കുന്ന പ്രദേശങ്ങളില് വെള്ളം ടാങ്കറിലും ലഭ്യമാക്കണമെന്നും യോഗത്തില് ആവശ്യമുയര്ന്നു. ഇത് ജില്ലാ വികസനസമിതിയുടെ ശുപാര്ശയായി സര്ക്കാരിന് സമര്പ്പിക്കും.
തദ്ദേശ സ്വയംഭരണസ്ഥാപനങ്ങളുടെ പദ്ധതി വിഹിതത്തിന്റെ 22 % മാത്രമാണ് ഇതുവരെ ചെലവായിട്ടുള്ളതെന്നും പദ്ധതികള് വേഗം നടപ്പാക്കി വിഹിതം ചെലവഴിക്കണമെന്നും യോഗം നിര്ദേശം നല്കി.തിരഞ്ഞെടുപ്പ് വേളയിലെ മികച്ച പ്രവര്ത്തനത്തിന് തെരഞ്ഞെടുപ്പ് കമ്മീഷന്റെ അവാര്ഡ് രാഷ്ട്രപതിയില് നിന്നും എറ്റുവാങ്ങിയ കളക്ടര് മുഹമ്മദ് വൈ സഫിറുള്ളയെ യോഗത്തില് എംഎല്എമാര് അഭിനന്ദിച്ചു. ജില്ലാ പഌനിംഗ് ഓഫീസര് സാലി ജോസഫ്, തദ്ദേശസ്വയംഭരണസ്ഥാപനങ്ങളുടെ പ്രതിനിധികള്, വിവിധ വകുപ്പുദ്യോഗസ്ഥര് തുടങ്ങിയവര് യോഗത്തില് പങ്കെടുത്തു.
