നാഗ്പൂര്: ഇംഗ്ലണ്ടിനെതിരായ മൂന്ന് മത്സരങ്ങളുടെ ട്വന്റി 20 പരമ്പരയിലെ രണ്ടാം പോരാട്ടം ഇന്ന്. രാത്രി 7ന് വിദര്ഭ ക്രിക്കറ്റ് അസോസിയേഷന് സ്റ്റേഡിയത്തിലാണ് കളി. ആദ്യ മത്സരത്തില് ഏഴ് വിക്കറ്റിന്റെ ദയനീയ പരാജയം ഏറ്റുവാങ്ങിയ ടീം ഇന്ത്യക്ക് പരമ്പര നേടണമെങ്കില് ഇനിയുള്ള രണ്ട് കളികളും ജയിക്കണം. അതേസമയം ടെസ്റ്റ്, ഏകദിന പരമ്പര നഷ്ടപ്പെട്ട ഇംഗ്ലണ്ട് ഇന്ന് ജയിച്ച് ട്വന്റി 20 പരമ്പര സ്വന്തമാക്കാനാകും ശ്രമിക്കുക.
ആദ്യ കളിയില് ഇന്ത്യയുടെ ബാറ്റ്സ്മാന്മാരുടെ നിരുത്തരവാദപരമായ പ്രകടനമാണ് ഇന്ത്യക്ക് തിരിച്ചടിയായത്. ആദ്യം ബാറ്റ് ചെയ്ത ഇന്ത്യക്ക് 7 വിക്കറ്റ് നഷ്ടത്തില് 147 റണ്സ് മാത്രമെടുക്കാനാണ് കഴിഞ്ഞത്. ഓപ്പണര് ലോകേഷ് രാഹുല്, യുവരാജ് സിങ്, മനീഷ് പാണ്ഡെ, ഹാര്ദിക് പാണ്ഡ്യ തുടങ്ങിയവരെല്ലാം തീര്ത്തും നിരാശപ്പെടുത്തി. ധോണിയായിരുന്നു ഈ മത്സരത്തിലെ ഇന്ത്യന് ടോപ്സ്കോറര്. ടീമിലേക്ക് മടങ്ങിയെത്തിയ സുരേഷ് റെയ്നയും നായകന് വിരാട് കോഹ്ലിയും മാത്രമാണ് അല്പമെങ്കിലും ഭേദപ്പെട്ട പ്രകടനം നടത്തിയത്. ബൗളര്മാരും മികച്ച പ്രകടനം നടത്താന് കഴിയാതെ വിഷമിച്ചു.
അതേസമയം ഇംഗ്ലണ്ട് മുന്നിര ബാറ്റ്സ്മാന്മാരായ ബില്ലിങ്ങ്സ്, ജോ റൂട്ട്, മോര്ഗന് എന്നിവര് മികച്ച ഫോമിലാണെന്നത് അവരുടെ ആത്മവിശ്വാസം കൂട്ടുന്നു. ബൗളര്മാരും മികച്ച രീതിയില് പന്തെറിഞ്ഞതോടെയാണ് ഇന്ത്യന് ബാറ്റ്സ്മാന്മാര് റണ് കണ്ടെത്താന് കഴിയാതെ വിഷമിച്ചത്. എന്തായാലും ആദ്യ മത്സരത്തിലേറ്റ തോല്വിക്ക് പകരംവീട്ടാനുറിച്ച് കോഹ്ലിക്കൂട്ടവും പരമ്പര സ്വന്തമാക്കുക എന്ന ലക്ഷ്യത്തോടെ ഇംഗ്ലണ്ടും ഇറങ്ങുമ്പോള് ആവേശകരമായ പോരാട്ടം അരങ്ങേറും.
