മെല്ബണ്: മുന് ഒന്നാം നമ്പര് താരങ്ങള് റാഫേല് നദാലും സെറീന വില്യംസും ഓസ്ട്രേലിയന് ഓപ്പണ് സെമിഫൈനലില്. ഒമ്പതാം സീഡ് നദാല് സെമിയില് 15ാം സീഡ് ബള്ഗേറിയയുടെ ഗ്രിഗര് ദിമിത്രോവിനെ നേരിടും. വനിതകളില് രണ്ടാം സീഡ് സെറീനയുടെ എതിരാളി ക്രൊയേഷ്യയുടെ സീഡില്ലാ താരം മിര്ജാന ലൂസിച്ച് ബറോനി. മിക്സഡ് ഡബിള്സില് രണ്ടാം സീഡ് സാനിയ മിര്സ-ഇവാന് ദോദിഗ് സഖ്യവും അവസാന നാലില്.
മൂന്നാം സീഡ് കാനഡയുടെ മിലോസ് റാവോനിക്കിനെയാണ് ക്വാര്ട്ടറില് നദാല് മറികടന്നത് (6-4, 7-6, 6-4). രണ്ടാം സെറ്റില് മാത്രമാണ് നദാലിന് വെല്ലുവിളിയുയര്ത്താന് റാവോനിക്കിനായത്. 11ാം സീഡ് ബെല്ജിയത്തിന്റെ ഡേവിഡ് ഗോഫിന്റെ വെല്ലുവിളി ദിമിത്രോവ് അവസാനിപ്പിച്ചു (6-3, 6-2, 6-4). ഏറെക്കുറെ അനായാസമായിരുന്നു ബള്ഗേറിയന് താരത്തിന്റെ ജയം. റോജര് ഫെററും സ്റ്റാനിസ്ലസ് വാവ്റിങ്കയുമാണ് ആദ്യ സെമിയില് ഏറ്റുമുട്ടുക. സെമി കടമ്പകള് കടന്നാല് ഫെഡറര്-നദാല് ക്ലാസിക്ക് ഫൈനലിനാകും ഒരുപക്ഷേ മെല്ബണ് സാക്ഷിയാകുക.
ഒമ്പതാം സീഡ് ബ്രിട്ടന്റെ ജൊഹാന കോണ്ടയെ തോല്പ്പിച്ചാണ് സെറീന മുന്നേറിയത് (6-2, 6-3). അനായാസമായിരുന്നു ലോക രണ്ടാം നമ്പര് താരത്തിന്റെ ജയം. അഞ്ചാം സീഡ് കരോളിന പ്ലിസ്കോവയെ തുരത്താന് നന്നായി അധ്വാനിക്കേണ്ടിവന്നു മിര്ജാനയ്ക്ക് (6-4, 3-6, 6-4). 35 വയസുള്ള മിര്ജാനയുടെ ഓസ്ട്രേലിയന് ഓപ്പണ് സിംഗിള്സിലെ ഏറ്റവും വലിയ നേട്ടമാണിത്. 1998ല് വനിതാ ഡബിള്സ് കിരീടം നേടിയിരുന്നു. 1999ല് വിംബ്ള്ഡണ് സെമിയിലെത്തിയതിനു ശേഷം ഗ്രാന്ഡ്സ്ലാമിലെ വലിയ നേട്ടവുമായി ഇത്. ഡബിള്സ് ആദ്യ സെമിയില് വീനസ് വില്യംസും കോകോ വാന്ഡെവെഗെയും ഏറ്റുമുട്ടും. വില്യംസ് സഹോദരിമാരുടെ പോരാട്ടത്തിന് മെല്ബണ് സാക്ഷിയാകുമോയെന്ന് ആരാധകരുടെ നോട്ടം.
മിക്സഡ് ഡബിള്സില് രോഹന് ബൊപ്പണ്ണ-കാനഡയുടെ ഗബ്രിയേല ദബ്രോവ്സ്കി സഖ്യത്തെ മറികടന്നാണ് സാനിയും ദോദിഗും അവസാന നാലിലിടം നേടിയത് (6-4, 3-6, 12-10). ലിയാന്ഡര് പേസ്-മാര്ട്ടിന ഹിംഗിസ്, സാമന്ത സോസ്റ്റര്-സാം ഗ്രോത്ത് മത്സരവിജയികള് സാനിയ സഖ്യത്തിന്റെ സെമി എതിരാളി.
പുരുഷ ഡബിള്സ് സെമിയില് മാര്ക്ക് പോള്മാന്സ്-ആന്ഡ്ര്യു വിറ്റിങ്ടണ് സഖ്യം ഹെന്റി കോന്റെയ്ന്-ജോണ് പീഴ്സ് കൂട്ടുകെട്ടിനെയും; ബോബ് ബ്രയാന്-മൈക്ക് ബ്രയാന് ജോഡി പാബ്ലൊ കറാനൊ ബുസ്റ്റ-ഗ്വില്ലെര്മൊ ഗാര്ഷ്യ ലോപസ് സഖ്യത്തെയും നേരിടും. വനിതാ കിരീടത്തിനായി രണ്ടാം സീഡ് ബെഥാനി മാറ്റെക് സാന്ഡ്സ്-ലൂസി സഫറോവ സഖ്യം ആന്ദ്രിയ ഹല്ക്കോവ-ഷുവായി പെങ് കൂട്ടുകെട്ടിനെ നേരിടും.
