കട്ടക്ക്: ഏകദിന ക്രിക്കറ്റില് സിക്സറുകളുടെ എണ്ണത്തില് ധോണിക്ക് ഡബിള് സെഞ്ചുറി. ഇന്നലെ ഇന്നലെ ഇംഗ്ലണ്ടിനെതിരായ രണ്ടാം ഏകദിനത്തില് ആറ് സിക്സറുകള് പായിച്ചതോടെ 200 സിക്സ് നേടുന്ന ആദ്യ ഇന്ത്യന് താരമെന്ന ബഹുമതിയും സ്വന്തമാക്കി.
285-ാം മത്സരം കളിച്ച ധോണി ഇതുവരെ 203 സിക്സറുകളാണ് അടിച്ചുകൂട്ടിയത്. ഒപ്പം ഏറ്റവും കൂടുതല് സിക്സടിച്ച നാലാമത്തെ താരവും. 200 എണ്ണം അടിച്ച ന്യൂസിലാന്ഡ് മുന് നായകന് ബ്രണ്ടന് മക്കല്ലത്തെ പിന്തള്ളിയാണ് ധോണി നാലാം സ്ഥാനത്തേക്കുയര്ന്നത്.
പാക്കിസ്ഥാന്റെ വെടിക്കെട്ട് താരം ഷാഹിദ് അഫ്രീദിയുടെ പേരിലാണ് ഏറ്റവും കൂടുതല് സിക്സറടിച്ചതിന്റെ റെക്കോര്ഡ്. 398 ഏകദിനങ്ങളില് നിന്ന് 351 സിക്സാണ് അഫ്രീദി നേടിയത്. 445 മത്സരങ്ങളില് നിന്ന് 270 സിക്സടിച്ച ശ്രീലങ്കന് താരം സനത് ജയസൂര്യ രണ്ടാം സ്ഥാനത്തും 238 എണ്ണം അടിച്ച വെസ്റ്റ് ഇന്ഡീസ് താരം ക്രിസ് ഗെയ്ല് മൂന്നാമതും.
സച്ചിന് ടെണ്ടുല്ക്കറുടെ പേരിലുള്ള 195 സിക്സുകളുടെ റെക്കോഡാണ് ധോണി മറികടന്നത്. ഇന്ത്യയുടെ മുന് നായകന് സൗരവ് ഗാംഗുലിയാണ് സിക്സുകളുടെ നേട്ടത്തില് മൂന്നാമന്. 190 എണ്ണമാണ് ഗാംഗുലിയുടെ അക്കൗണ്ടിലുള്ളത്.
