കണ്ണൂര്: തറിയുടെ തിറയുടെ നാട്ടിലേക്ക് കലാപ്രതിഭകളെ സ്വാഗതം ചെയ്ത് സ്വാഗതഗാനവും നൃത്തവും. വേദി ഒന്നില് ഉദ്ഘാടനസമ്മേളനം ആരംഭിക്കുന്നതിന് തൊട്ടുമുമ്പാണ് വിശിഷ്ടാതിഥികളെയും കലാപ്രതിഭകളെയും കലാസ്നേഹികള്ക്കും സ്വാഗതമോതി സ്വാഗതഗാനവും നൃത്തവും അവതരിപ്പിക്കപ്പെട്ടത്. 15 മിനുറ്റ് ദൈര്ഘ്യമുള്ള ഗാനം കണ്ണൂരിന്റെ ചരിത്രവും കലയും സംസ്കാരവും അടിസ്ഥാനമാക്കിയാണ് ഒരുക്കിയത്.
അക്ഷരമഗ്നിയിലലിയിച്ചറിവിന് നീലാകാശം തേടും പറവകള് …, അനന്ത നക്ഷത്രങ്ങള് വിളക്കായ് നിറകതിര് ചൊരിയും മനസ്സില്…. എന്നു തുടങ്ങുന്ന ഗാനമാലപിച്ചത് കണ്ണൂര് ജില്ലയിലെ 57 സംഗീത അദ്ധ്യാപകരാണ്. സ്വാഗതഗാനത്തിനൊപ്പം നൃത്തച്ചുവടുകളുമായി എത്തിയത് കണ്ണൂരിലെ വിവിധ സ്കൂളുകളില് നിന്നുള്ള 77 വിദ്യാര്ത്ഥികളും.
കഥകളിയും പൂരക്കളിയും കളരിപ്പയറ്റും തിരുവാതിരയും ഒപ്പനയും മാര്ഗ്ഗംകളിയും വേദിയില് നിറഞ്ഞു. ഭരതനാട്യവും മോഹിനിയാട്ടവും നാടോടിനൃത്തവും സ്വാഗതനൃത്തത്തിന് മിഴിവേകി. ഹെര്മ്മന് ഗുണ്ടര്ട്ടും കേരള വര്മ്മ വീരപഴശ്ശിരാജയും രംഗത്ത് അവതരിപ്പിക്കപ്പെട്ടു.
ചിറക്കല് രാജാസ് എച്ച്എസ്എസ് പ്രിന്സിപ്പല് ഡോ. എ.എസ്. പ്രശാന്ത് കൃഷ്ണന് രചിച്ച സ്വാഗതഗാനത്തിന് സംഗീതം നല്കിയത് പാതിരിയോട് എച്ച്എസ്സിലെ സംഗീതഅദ്ധ്യാപകന് എ.എം. ദിലീപ്കുമാറാണ്. നൃത്തസംവിധാനം ചെയ്തത് നയന്താര മഹാദേവനും ഐ. വിനോദ്കുമാറും ചേര്ന്നാണ്. പി.എന്. മോഹനനാണ് കോ-ഓര്ഡിനേഷന് നിര്വ്വഹിച്ചത്.
