ശബരിമല: മകരസംക്രമ ദിനത്തില് ശബരീശന് അഭിഷേകത്തിനായുളള നെയ്ത്തേങ്ങ കവടിയാര് കൊട്ടാരത്തില് നിന്നു സന്നിധാനത്തെത്തിച്ചു. ഗുരുസ്വാമി രാമനാഥന്റെ നേതൃത്വത്തില് പതിനേഴുകാരനായ കന്നിഅയ്യപ്പന് വൈദ്യനാഥ അയ്യരാണ് നെയ്മുദ്ര കവടിയാര് കൊട്ടാരത്തില് നിന്ന് ഏറ്റുവാങ്ങി സന്നിധാനത്തെത്തിച്ചത്.
തിരുവനന്തപുരത്ത് നവരാത്രി മണ്ഡപത്തില് വച്ച് വാദ്യഘോഷങ്ങളുടെ അകമ്പടിയോടെ തിരുവിതാംകൂര് രാജകുടുംബത്തിലെ ഇപ്പോഴത്തെ രാജസ്ഥാനി മൂലം തിരുനാള് രാമവര്മ്മയാണ് നെയ്ത്തേങ്ങ നിറച്ച് വൈദ്യനാഥ അയ്യര്ക്ക് കൈമാറിയത്. നാളെ ധനു മകരത്തിലേക്ക് സംക്രമിക്കുന്ന ശുഭമുഹൂര്ത്തമായ രാവിലെ 7.40ന് നടക്കുന്ന മകരസംക്രമപൂജാ മധ്യേ നെയ്യ് ഭഗവാന് അഭിഷേകം നടത്തും. 26 വര്ഷമായി മകരസംക്രമ ദിനത്തില് ഭഗവാന് അര്പ്പിക്കാനുളള നെയ്ത്തേങ്ങ കൊണ്ടുവരുന്ന കന്നിഅയ്യപ്പന്മാര്ക്ക് ഗുരുസ്വാമിയാണ് തിരുവനന്തപുരം പത്മനാഭസ്വാമി ക്ഷേത്ര ജീവനക്കാരനായ രാമനാഥന്.
തിരുവനന്തപുരം ശ്രീകണ്ഠേശ്വരം ലക്ഷ്മീനിവാസില് രാമസ്വാമി അയ്യരുടെ മകനും എസ്എംവി സ്കൂളില് പ്ലസ്ടു വിദ്യാര്ത്ഥിയുമായ വൈദ്യനാഥ അയ്യര് സംസ്ഥാന ജില്ലാ കലോല്സവങ്ങളില് മ്യദംഗം, ചാക്യാര്കൂത്ത് എന്നീ ഇനങ്ങളില് പുരസ്കാര ജേതാവുമാണ്.
