ആലപ്പുഴ: റവന്യൂവകുപ്പിനെ അഴിമതിമുക്തമാക്കാനും പ്രവര്ത്തനം കാര്യക്ഷമമാക്കുന്നതിനും കര്ശനനടപടികളുമായി മുന്നോട്ടെന്ന് ജില്ലാ കളക്ടര് വീണ എന്. മാധവന് അറിയിച്ചു. ആറു മാസത്തിനിടെ ഡെപ്യൂട്ടി കളക്ടര് അടക്കം പത്തു പേരെ അച്ചടക്കനടപടിയുടെ ഭാഗമായി സസ്പെന്ഡ് ചെയ്തു.
വില്ലേജ് ഫീല്ഡ് അസിസ്റ്റന്റുവരെ സസ്പെന്ഷനിലുണ്ട്. അച്ചടക്ക നടപടിയുടെ ഭാഗമായി പതിനഞ്ചു ജീവനക്കാര്ക്കെതിരേ കുറ്റപത്രം നല്കി. ഇവര്ക്കെതിരേയുള്ള നടപടി തുടരുന്നു. പരിശോധന, വിജിലന്സ് വിഭാഗങ്ങളുടെ നേതൃത്വത്തില് ഓഫീസുകളില് പരിശോധന ശക്തമാക്കിയിട്ടുണ്ട്.
കുട്ടനാട്, മാവേലിക്കര താലൂക്കുകളിലെ വില്ലേജ് ഓഫീസുകളില് കളക്ടര് കഴിഞ്ഞദിവസം മിന്നല് പരിശോധന നടത്തി. ക്രമക്കേടുകള്ക്കും അച്ചടക്കലംഘനത്തിനെതിരേയും സ്വീകരിക്കുന്ന നടപടികള്ക്ക് ജീവനക്കാരുടെ സംഘടനകള് പിന്തുണ അറിയിച്ചിട്ടുള്ളതായും വകുപ്പിലെ ജീവനക്കാര്ക്കെതിരേ ലഭിക്കുന്ന പരാതികള് ഗൗരവത്തോടെയാണ് കാണുന്നതെന്നും കളക്ടര് അറിയിച്ചു.
