കോട്ടയം: ദേവസ്വം ബോര്ഡിനെതിരെ ഗുരുതര ആക്ഷേപവുമായി ആലങ്ങാട്ടുയോഗം ശബരിമല സ്വാമി ഭക്തജനസംഘം. മകരവിളക്ക് ഉത്സവത്തോടനുബന്ധിച്ച് എരുമേലി പേട്ടതുള്ളല് തടസ്സപ്പെടുത്താനും പ്രശ്നമുണ്ടാക്കാനും ചിലര് ശ്രമിക്കുന്നതായി ആലങ്ങാട്ടുയോഗം പെരിയോന് എ.കെ. വിജയകുമാര് പത്രസമ്മേളനത്തില് ആരോപിച്ചു.
പേട്ടതുള്ളലിന്റെ നായകത്വം പരമ്പരാഗതമായി ആലങ്ങാട്ടുയോഗം ശബരിമല ഭക്തജനസംഘത്തിനാണ്. കോടതി വിധികളും, ദേവസ്വം കമ്മീഷണറുടെ ഉത്തരവുകളും നിലവിലുണ്ട്. 1950 മുതല് ശബരിമല ക്ഷേത്രം ഏറ്റെടുത്ത് മുതല്ക്കൂട്ട് സമ്പ്രദായം നടപ്പാക്കിയപ്പോള് മുതല് ആലങ്ങാട്ടുയോഗത്തിന്റെ പെരിയോനെ ബോര്ഡ് അംഗീകരിച്ച് അവകാശങ്ങള് നല്കുന്നുണ്ട്. 12 വര്ഷമായി എ.കെ. വിജയകുമാറാണ് പെരിയോന്. എന്നാല് നേതൃസ്ഥാനങ്ങളും അവകാശവും ലക്ഷ്യമിട്ട് ചില വ്യക്തികളും സംഘടനകളും നിരന്തരം പ്രശ്നങ്ങള് ഉണ്ടാക്കുകയാണ്. ഹൈക്കോടതി ഉത്തരവുകളെ മറികടന്ന് നിക്ഷിപ്ത താല്പര്യത്തിലുള്ള നീക്കങ്ങള്ക്ക് പിന്നില് ദേവസ്വം ബോര്ഡ് അംഗം അജയ് തറയിലിന്റെ പരോക്ഷ പിന്തുണയുള്ളതായും അദ്ദേഹം ആരോപിച്ചു.
ബോര്ഡിനെ സ്വാധീനിച്ച് പരോക്ഷ പിന്തുണ നേടിയ ഇവര് മുന്വര്ഷങ്ങളില് എരുമേലി പേട്ടതുള്ളല് അലങ്കോലപ്പെടുത്തി. ആലങ്ങാട്ടുയോഗക്കാരെ കയ്യേറ്റം ചെയ്യാന് ശ്രമിച്ചു. ആലങ്ങാട്ടുയോഗം ശബരിമല സ്വാമി ഭക്തജനസംഘം ഭാരവാഹികളായ എം.എന്. രാജപ്പന് നായര്, പി. കെ. രാജേഷ് എന്നിവരും പത്രസമ്മേളനത്തില് പങ്കെടുത്തു.
അന്നദാനം നടത്താന് അനുവദിക്കണം: അയ്യപ്പസേവാസമാജം
കൊച്ചി: ശബരിമലയില് സൗജന്യ അന്നദാനം നടത്താനുള്ള അധികാരം സന്നദ്ധസംഘടനകള്ക്ക് നല്കണമെന്ന് അയ്യപ്പസേവാ സമാജം ഭാരവാഹികള് പത്രസമ്മേളനത്തില് ആവശ്യപ്പെട്ടു.
ദേവസ്വംബോര്ഡ് സന്നിധാനത്ത് അന്നദാനം നടത്തുന്നുണ്ടെന്നാണ് അവകാശപ്പെടുന്നത്. എന്നാല് വളരെ കുറച്ച് പേര്ക്കു മാത്രമേ ഇത് പ്രയോജനപ്പെടുന്നുള്ളൂ. 55,000 പേര്ക്ക് ഭക്ഷണം നല്കാനേ സാധിക്കുകയുള്ളൂ. മറ്റ് പതിനായിരക്കണക്കിന് ആളുകള്ക്ക് ഹോട്ടലുകളെ ആശ്രയിക്കേണ്ടിവരുന്നു. ഹോട്ടലുകളില് വലിയ വില നല്കി മോശം ഭക്ഷണം കഴിക്കേണ്ട സാഹചര്യമാണുള്ളത്.
അയ്യപ്പസേവാസമാജം, അഖിലഭാരത അയ്യപ്പസേവാസംഘം, ശ്രീഭൂതനാഥ ട്രസ്റ്റ് എന്നീ സംഘടനകളാണ് ശബരിമലയില് സൗജന്യ അന്നദാനം നടത്തിവന്നത്. എന്നാല് ഇവരെ അതില്നിന്ന് ഒഴിവാക്കി. ഇതിന് വ്യക്തമായ കാരണം ബോധിപ്പിക്കുന്നില്ല. ഇക്കാര്യത്തില് ബോര്ഡും ദേവസ്വം വകുപ്പും സ്വീകരിക്കുന്ന നിഷേധാത്മക നിലപാട് അവസാനിപ്പിക്കണമെന്നും സമാജം ഭാരവാഹികള് ആവശ്യപ്പെട്ടു.
അയ്യപ്പസേവാ സമാജം വര്ക്കിംഗ് പ്രസിഡന്റ് സ്വാമി അയ്യപ്പദാസ്, ദേശീയ ജനറല് സെക്രട്ടറി ഈറോഡ് എന്. രാജന്, സംസ്ഥാന ജനറല് സെക്രട്ടറി അങ്ങാടിപ്പുറം അരവിന്ദാക്ഷന് എന്നിവര് പത്രസമ്മേളനത്തില് പങ്കെടുത്തു.
