ചേര്ത്തല: താലൂക്ക് ഓഫീസിനായുള്ള താല്ക്കാലിക കെട്ടിട നിര്മാണത്തില് അഴിമതിയെന്ന് ആരോപണം. കോടികള് മുടക്കി റസ്റ്റ് ഹൗസിന് സമീപം പണിയുന്ന കെട്ടിടത്തിന്റെ നിര്മ്മാണത്തെ ചൊല്ലിയാണ് പരാതി ഉയരുന്നത്.
നിലവിലെ താലൂക്ക് ഓഫീസ് കെട്ടിടം കാലപ്പഴക്കത്തില് ജീര്ണിച്ചതിനെ തുടര്ന്ന് പൊളിച്ച് ആധുനീക സൗകര്യങ്ങളോടെ മിനി സിവില് സ്റ്റേഷനോട് ചേര്ന്ന് അനക്സ് നിര്മിക്കാന് നേരത്തെ പദ്ധതി തയാറാക്കിയിരുന്നു. കെട്ടിടം പൊളിക്കുമ്പോള് താലൂക്ക് ഓഫീസ്, സബ് രജിസ്ട്രാര് ഓഫീസ് എന്നിവയുടെ പ്രവര്ത്തനം ഇവിടെ നിന്ന് മാറ്റുന്നതിനാണ് താല്കാലിക കെട്ടിടം നിര്മിക്കുന്നത്. ഒരുകോടി അഞ്ച് ലക്ഷം രൂപയാണ് നിര്മാണ ചെലവ്. പൊതുമരാമത്ത് വകുപ്പിന്റെ അശാസ്ത്രീയമായ പരിഷ്ക്കാരങ്ങള് സര്ക്കാരിന് വന് ബാധ്യത വരുത്തുമെന്നാണ് വിമര്ശനം. അനുയോജ്യമായ വാടക കെട്ടിടങ്ങള് കണ്ടെത്തി ഓഫീസുകളുടെ പ്രവര്ത്തനം ഇവിടേയ്ക്ക് മാറ്റുന്നതിന് പകരം കോടികള് മുടക്കി താല്ക്കാലിക കെട്ടിടം നിര്മിക്കുന്നത് അഴിമതിക്ക് കാരണമാകും.
കഴിഞ്ഞ മെയ് 28 നാണ് കെട്ടിടത്തിന്റെ നിര്മാണം ആരംഭിച്ചത്. നവംബര് 27 നുള്ളില് പണി പൂര്ത്തീകരിക്കുമെന്നായിരുന്നു വാഗ്ദാനം. പരമ്പരാഗത രീതിയില് ഓടുമേഞ്ഞ് 4000 ലധികം സ്ക്വയര് ഫീറ്റിലാണ് കെട്ടിടം നിര്മിക്കുന്നത്.
ഉദ്യോഗസ്ഥരുടെ അനാസ്ഥ മൂലം കെട്ടിട നിര്മാണം പാതിവഴിയില് മുടങ്ങി. റെസ്റ്റ് ഹൗസ് കോമ്പൗണ്ടില് നിരവധി കെട്ടിടങ്ങള് ഉപയോഗിക്കാതെ കിടന്നിട്ടും അത് പ്രയോജനപ്പെടുത്താതെ ഖജനാവിന് നഷ്ടമുണ്ടാക്കുന്ന തരത്തില് താല്ക്കാലിക കെട്ടിടം നിര്മിക്കാന് അനുമതി നല്കിയതിനെ കുറിച്ച് വിശദമായ അന്വേഷണം നടത്തണമെന്ന ആവശ്യം ശക്തമായിട്ടുണ്ട്.
താല്ക്കാലിക കെട്ടിടം ഉപയോഗത്തിനു ശേഷം ആധൂനിക സജ്ജീകരണങ്ങളോടെയുള്ള റസ്റ്റ് ഹൗസായി നിലനിര്ത്താനാണ് തീരുമാനിച്ചിട്ടുള്ളതെന്നാണ് പൊതുമരാമത്ത് വകുപ്പ് അധികൃതരുടെ വിശദീകരണം.
