ന്യൂദല്ഹി: പ്രധാനമന്ത്രി നരേന്ദ്ര മോദിയുടെ സാമ്പത്തിക പരിഷ്കരണ നടപടികള്ക്ക് ബിജെപി ദേശീയ നിര്വ്വാഹക സമിതി യോഗത്തിന്റെ പൂര്ണ പിന്തുണ. സാധാരണക്കാര്ക്ക് പ്രയോജനപ്പെടുന്ന നടപടികളുമായി മുന്നോട്ട്പോകാനും പ്രതിപക്ഷ പ്രചാരണത്തെ ഒറ്റക്കെട്ടായി നേരിടാനും യോഗം തീരുമാനിച്ചു. നോട്ട് റദ്ദാക്കല് തെരഞ്ഞെടുപ്പില് മുഖ്യവിഷയമായി ഉയര്ത്തിക്കാട്ടും. മുതിര്ന്ന നേതാക്കളായ എല്.കെ.അദ്വാനി, മുരളീ മനോഹര് ജോഷി തുടങ്ങിയവരും സര്ക്കാരിനെ പ്രശംസിച്ചു.
നോട്ട് അസാധുവാക്കല്, മിന്നലാക്രമണം എന്നിവയിലൂന്നിയാണ് നിര്വ്വാഹക സമിതിക്ക് മുന്നോടിയായുള്ള ദേശീയ ഭാരവാഹി യോഗം ഉദ്ഘാടനം ചെയ്ത് അധ്യക്ഷന് അമിത് ഷാ സംസാരിച്ചത്. കള്ളപ്പണത്തിനെതിരായ നോട്ട് റദ്ദാക്കലും പാക്കിസ്ഥാനെതിരായ മിന്നലാക്രമണവും ചരിത്രപരമായ തീരുമാനമാണെന്ന് ഷാ ചൂണ്ടിക്കാട്ടി. രാഷ്ട്ര സുരക്ഷക്ക് വേണ്ടിയായിരുന്നു മിന്നലാക്രമണം.
നോട്ട് റദ്ദാക്കല് സാമ്പത്തിക സുരക്ഷക്കും. നോട്ട് റദ്ദാക്കലിന്റെ ഗുണം ലഭിക്കാന് പോകുന്നത് പാവപ്പെട്ടവര്ക്കാണെന്നും ഷാ ചൂണ്ടിക്കാട്ടി. അഴിമതി ഇല്ലാതാക്കാന് മോദി എന്തു ചെയ്തെന്ന് ചോദിച്ചിരുന്ന പ്രതിപക്ഷം നോട്ട് റദ്ദാക്കിയപ്പോള് എന്തിനാണ് ചെയ്തതെന്ന് ചോദിക്കുന്നുവെന്ന് യോഗത്തിന് ശേഷം പത്രസമ്മേളനത്തില് കേന്ദ്രമന്ത്രി പ്രകാശ് ജാവ്ദേക്കര് പറഞ്ഞു. വരുന്ന സംസ്ഥാന തെരഞ്ഞെടുപ്പുകളില് നോട്ട് റദ്ദാക്കലും അഴിമതിക്കെതിരായ നടപടികളും പ്രചാരണ വിഷയമാക്കുമെന്നും അദ്ദേഹം വ്യക്തമാക്കി.
തെരഞ്ഞെടുപ്പ് നടക്കുന്ന സംസ്ഥാനങ്ങളിലെ പ്രവര്ത്തനവും രാഷ്ട്രീയ സാഹചര്യവും യോഗത്തില് വിലയിരുത്തി. സംസ്ഥാന അധ്യക്ഷന്മാര് റിപ്പോര്ട്ട് അവതരിപ്പിച്ചു. നോട്ട് റദ്ദാക്കല് രാഷ്ട്രീയമായി തിരിച്ചടിക്കില്ലെന്ന് യോഗം വിലയിരുത്തി. കേന്ദ്രസര്ക്കാര് കള്ളപ്പണത്തിനെതിരാണെന്ന വികാരം സാധാരണക്കാരില് ഉളവാക്കാന് സാധിച്ചു. അഞ്ച് സംസ്ഥാനങ്ങളിലും കേവല ഭൂരിപക്ഷത്തോടെ അധികാരത്തിലെത്താന് സാധിക്കുമെന്ന് യോഗം പ്രതീക്ഷ പ്രകടിപ്പിച്ചു.
വൈകിട്ട് ദേശീയ നിര്വ്വാഹക സമിതി യോഗം അമിത് ഷായും മോദിയും ഉദ്ഘാടനം ചെയ്തു. യോഗം ഇന്ന് അവസാനിക്കും. തെരഞ്ഞെടുപ്പ് പ്രചാരണ പദ്ധതികള്ക്കും രൂപം നല്കും.
