വിഴിഞ്ഞം: കേരളത്തിന്റെ തനതുകലാരൂപങ്ങള് അവതരിപ്പിക്കുന്ന ഉത്സവ പരിപാടി കോവളത്ത് ആരംഭിച്ചു.രണ്ടു വര്ഷത്തെ ഇടവേളക്ക് ശേഷമാണ് കോവളം തീരത്തേക്ക് ഈ പരിപാടി എത്തിയത്. ടൂറിസം വകുപ്പിന്റെ നേതൃത്വത്തില് നടക്കുന്ന ‘ഉത്സവം’ പരിപാടി വിദേശികളെ കൂടാതെ തദ്ദേശീയര്ക്കും നവ്യാനുഭവമാകും. ജില്ലയിലെ ഏക വേദിയായ കോവളത്ത് ജനുവരി 11 വരെ ഉത്സവം അരങ്ങേറും.
ദിവസവും വൈകുന്നേരങ്ങളില് രണ്ടു കലാരൂപങ്ങളാണ് അരങ്ങേറുക. ഇന്ന് ദ്വാരക കൃഷ്ണന് അവതരിപ്പിക്കുന്ന കണ്യാര്കളി, പ്രമോദ് അവതരിപ്പിക്കുന്ന നിണബലി ജനുവരി ഏഴിന് ഉണ്ണികൃഷ്ണന് അവതരിപ്പിക്കുന്ന പൂതനും തിറയും, കണ്ണപ്പന് അവതരിപ്പിക്കുന്ന തോല്പ്പാവ കൂത്ത്, 8ന് സുധാകരനും സംഘവും അവതരിപ്പിക്കുന്ന ചരടു പിന്നിക്കളി, പുതുമന ഗോവിന്ദന് നമ്പൂതിരിയും സംഘവും അവതരിപ്പിക്കുന്ന തിടമ്പുനൃത്തവും അരങ്ങിലെത്തും. ഒമ്പതിന് കീഴില്ലംഉണ്ണിക്കൃഷ്ണന് അവതരിപ്പിക്കുന്ന മുടിയേറ്റും മുകുന്ദ പ്രസാദിന്റെ ഗരുഡന് പറവയും പത്താം തിയതി ദേവീവിലാസം അവതരിപ്പിക്കുന്ന പടയണി തലയല് കേശവന് നായര് സംഘത്തിന്റെ വില്പ്പാട്ടും അരങ്ങിലെത്തും. പതിനൊന്നാം തീയതി കോട്ടവട്ട തങ്കപ്പന് അവതരിപ്പിക്കുന്ന പൂപ്പട തുള്ളല് ആണ്ടിപ്പണിക്കര് അവതരിപ്പിക്കുന്ന തെയ്യം എന്നിവയോടെ ഉത്സവത്തിനു തിരശ്ശീല വീഴും.
