മേപ്പയൂര്: പൊതുവിദ്യാഭ്യാസ സംരക്ഷണത്തിന്റെ ഭാഗമായി മേപ്പയൂര് ഗവ. വൊക്കേഷണല് ഹയര്സെക്കണ്ടറി സ്കൂള് രാജ്യാന്തര നിലവാരത്തിലുയര്ത്തുന്നത് സംബന്ധിച്ചുള്ള പ്രഖ്യാപനം വിദ്യാഭ്യാസ മന്ത്രി സി. രവീന്ദ്രനാഥ് നിര്വ്വഹിച്ചു. സമൂഹത്തില് ഉന്നതനിലവാരത്തിലെത്തിയവരെല്ലാം പൊതുവിദ്യാഭ്യാസ സമ്പ്രദായത്തിലൂടെ പഠിച്ചുവന്നവരാണ്, പൊതുവിദ്യാഭ്യാസത്തിന്റെ ജനീകയവല്ക്കണവും സാമൂഹ്യവല്ക്കരണവും ജനകീയ കൂട്ടായ്മയിലൂടെയാവണമെന്നും ഇന്നത്തെ വിദ്യാഭ്യാസം സാമൂഹ്യപ്രതിബദ്ധതയുള്ള സമൂഹത്തെ സൃഷ്ടിക്കുമെന്നും മന്ത്രി പറഞ്ഞു. സ്കൂള് മികവിന്റെ കേന്ദ്രം പദ്ധതി മേപ്പയൂര് ഗവ. വൊക്കേഷണല് ഹയര്സെക്കണ്ടറി സ്കൂളിന് ലഭിച്ച പുതുവത്സര സമ്മാനമാണന്ന് അധ്യക്ഷത വഹിച്ച ടി.പി. രാമകൃഷ്ണന് പറഞ്ഞു. സ്പോര്ട്സ് കോംപ്ലക്സ് പ്രഖ്യാപനവും മന്ത്രി നിര്വ്വഹിച്ചു.
പൊതുജനങ്ങളില് നിന്നും സമാഹരിച്ച വിദ്യാലയ സമഗ്രവികസന നിധിയിലേക്കുള്ള ഒരു കോടി രൂപയുടെ ചെക്ക് സ്കൂള് പിടിഎ പ്രസിഡന്റ് കെ. രാജീവന് വിദ്യാഭ്യാസ മന്ത്രിക്ക് കൈമാറി. ‘കുഞ്ഞനുജത്തിക്കൊരു കുഞ്ഞുവീട്’ പദ്ധതിക്കായി വിദ്യാര്ത്ഥി-അധ്യാപക അനദ്ധ്യാപകരില് നിന്നും ശേഖരിച്ച മൂന്നരലക്ഷം രൂപയുടെ ചെക്ക് സ്കൂള് പാര്ലമെന്റ് ചെയര്പേഴ്സണ് മഞ്ജിമ മനോജ് സ്കൂള് സമഗ്രവികസന നിധിയിലേക്ക് അദ്ധ്യാപക-അനദ്ധ്യാപക വിഹിതമായ പത്ത്ലക്ഷം രൂപയുടെ ചെക്ക് സ്കൂള് ഹെഡ്മാസ്റ്റര് ആര്. പ്രേമരാജന് എന്നിവര് വിദ്യാഭ്യാസമന്ത്രിക്ക് കൈമാറി.
സ്പോര്ട്സ് കോംപ്ലക്സ് സ്കൂള് പ്രൊജക്ട് രൂപകല്പ്പന ചെയ്ത ആര്.എസ്. ഘനശ്യാം, ദ്രൗപതി മോഹന് എന്നിവര്ക്കുള്ള ഉപഹാരം മന്ത്രി ടി.പി. രാമകൃഷ്ണന് നല്കി. സംസ്ഥാന നീന്തലില് ഒന്നാം സമ്മാനം ലഭിച്ച അക്ഷയ് പ്രകാശ്, പി.ടി. ഭാസ്കരപണിക്കര് പ്രൊജക്ട് അവതരണത്തില് ഗോള്ഡ് മെഡലിന് അര്ഹയായ എസ്.പി. അശ്വതിക്കും വിദ്യാഭ്യാസമന്ത്രി ഉപഹാരം നല്കി. സ്കൂളിന്റെ ജലദൗര്ലഭ്യ പരിഹാരത്തിനായി കിണര് നിര്മ്മിക്കാനുള്ള സ്ഥലത്തിന്റെ സമ്മതപത്രം കെ.കെ. മജീദ് സ്കൂള് ഹെഡ്മാസ്റ്റര്ക്ക് കൈമാറി. നവകേരള വിദ്യാലയം സര്ക്കാര് കാഴ്ചപ്പാട്-പ്രബന്ധാവതരണം പേരാമ്പ്ര മണ്ഡലം വികസന മിഷന് ചെയര്മാന് എം. കുഞ്ഞമ്മദ് അവതരിപ്പിച്ചു.
വി.പി. ഉണ്ണികൃഷ്ണന് സ്കൂള് പ്രൊജക്ട് അവതരിപ്പിച്ചു. ക്ഷേമകാര്യ സ്റ്റാന്റിംഗ് കമ്മിറ്റി ചെയര്പേഴ്സണ് സുജാത മനക്കല്, ഇ.കെ. സുരേഷ് കുമാര്, ഇ. അശോകന് എന്നിവര് ആശംസ നേര്ന്നു. മേലടി ബ്ലോക്ക് പഞ്ചായത്ത് പ്രസിഡന്റ് കെ കുഞ്ഞിരാമന് സ്വാഗതം പറഞ്ഞു. തുടര്ന്ന് വിവിധ വിഷയങ്ങളില് ചര്ച്ചകള് നടന്നു. പേരാമ്പ്ര നിയോജകമണ്ഡലം വിദ്യാഭ്യാസ മിഷന് രൂപീകരണം വികസന സെമിനാര് പ്രബന്ധം അവതരിപ്പിച്ചു.
