പത്തനംതിട്ട : ഭരണഘടനാപരമായ മൗലിക അവകാശങ്ങളോടൊപ്പം മൗലിക കടമകളും നിര്‍വ്വഹിക്കുവാന്‍ പൊതുസമൂഹം തയ്യാറാകേണ്ടതാണെന്ന് പത്തനംതിട്ട ലീഗല്‍ സര്‍വ്വീസ് സൊസൈറ്റി സെക്രട്ടറി (സബ് ജഡ്ജ്) ആര്‍. ജയകൃഷ്ണന്‍.
ചെങ്ങന്നൂര്‍ പ്രൊവിഡന്‍സ് എഞ്ചിനീയറിംഗ് കോളേജ് വിദ്യാര്‍ത്ഥികള്‍ പൂവത്തൂര്‍ പരിസ്ഥിതി വിജ്ഞാനകേന്ദ്രത്തില്‍ നടത്തിയ പമ്പാനദീസംരക്ഷണവും പരിപാലനവും എന്ന വിഷയത്തില്‍ നടത്തിയ സംവാദം ഉത്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭരണഘടന 51 എ.ജി. അനുസരിച്ച് പരിസ്ഥിതിസംരക്ഷണം ഓരോ പൗരന്റെയും മൗലികകടമയാണ്.ജീവന്‍ നിലനിര്‍ത്തുന്നതിനനിവാര്യമായ വെള്ളം, വായു തുടങ്ങിയ പ്രകൃതി വിഭവങ്ങള്‍ മലിനീകരിക്കുന്നത് മനുഷ്യാവകാശ ലംഘനമാണ് നിലവിലുള്ള നിയമങ്ങളനുസരിച്ച് ശിക്ഷാര്‍ഹമായ കുറ്റവുമാണ്. നമ്മളുടെ നദികളും മറ്റ് പ്രകൃതി വിഭവങ്ങളും ഭാവിതലമുറകള്‍ക്കു വേണ്ടി സംരക്ഷിക്കുന്നതിന് യുവ എഞ്ചിനീയര്‍മാര്‍ ജാഗരൂഗരായിരിക്കണമെന്ന് അദ്ദേഹം ആഹ്വാനം ചെയ്തു.
എന്‍.കെ.സുകുമാരന്‍ നായര്‍, പരിസ്ഥിതി വിജ്ഞാനകേന്ദ്രം ഡയറക്ടര്‍ ഡോ. കെ.എസ്. ബിനു, റിസേര്‍ച്ച് ഫെലോ കെ.ആര്‍. ജയശ്രീ എന്നിവര്‍ വിദ്യാര്‍ത്ഥികളുടെ സംശയങ്ങള്‍ക്ക് വിശദീകരണം നല്‍കി. പുണ്യനദിയുടെ സംരക്ഷണത്തിനായി പമ്പാനദിക്കരയില്‍ വിദ്യാര്‍ത്ഥികള്‍ മനുഷ്യചങ്ങല തീര്‍ക്കുകയും, നദീസംരക്ഷണത്തിനു തങ്ങളാലാവുംവിധം പ്രവര്‍ത്തിക്കുമെന്ന് പ്രതിജ്ഞ എടുക്കുകയും ചെയ്തു. കോളേജ് എന്‍എസ്എസ് പ്രോഗ്രാം കോ-ഓര്‍ഡിനേറ്റര്‍മാരായ സുബി എലിസബേത്ത്, റോബിന്‍ ജയിംസ് എന്നിവര്‍ പരിപാടികള്‍ക്ക് നേതൃത്വം നല്‍കി.
