പത്തനംതിട്ട: ജില്ലയിലെ കുടിവെള്ള പ്രശ്നം പരിഹരിക്കാന് അടിയന്തര നടപടി ഉണ്ടാവണമെന്ന് ജില്ലാ വികസന സമിതി യോഗത്തില് എം. എല്. എമാരായ വീണാ ജോര്ജ്, രാജു എബ്രഹാം, അടൂര് പ്രകാശ് എന്നിവര് ആവശ്യപ്പെട്ടു. വിവിധ സ്ഥലങ്ങളിലെ കുടിവെള്ള പ്രശ്നം എം. എല്. എമാര് യോഗത്തില് ഉന്നയിച്ചു. എ. ഡി. എം അനു എസ്. നായര് അദ്ധ്യക്ഷത വഹിച്ചു.
ചെന്നീര്ക്കര മെഴുവേലി പദ്ധതിയില് നല്ലാനിക്കുന്നിലെ മോട്ടോര് കത്തിപ്പോകുന്നതിനാല് പലയിടത്തും വെള്ളം ലഭിക്കുന്നില്ലെന്ന് വീണാ ജോര്ജ് എം. എല്. എ പറഞ്ഞു. ഇവിടെ കെ. എസ്. ഇ. ബിയും വാട്ടര് അതോറിറ്റിയും തമ്മില് തര്ക്കം നിലനില്ക്കുന്നുണ്ട്. പ്രശ്നം പരിഹരിക്കാന് വീണാ ജോര്ജ് എം. എല്. എയുടെ അധ്യക്ഷതയില് ജനുവരി മൂന്നിന് ഉദ്യോഗസ്ഥരുടെ യോഗം ചേരും. കുടിവെള്ള ക്ഷാമം രൂക്ഷമായതിനാല് കെ. ഐ. പി കനാല് തുറക്കണമെന്ന് അടൂര് പ്രകാശ് എം. എല്. എ പ്രമേയത്തിലൂടെ ആവശ്യപ്പെട്ടു. കുന്നാര് ഡാമിന്റെ ഉയരം കൂട്ടണമെന്ന ആവശ്യം വികസന സമിതിയുടെ തീരുമാനമായി സര്ക്കാരിനെ അറിയിക്കണമെന്ന് രാജു എബ്രഹാം എം. എല്. എ പറഞ്ഞു. കെ. ഐ.പി, പി. ഐ. പി കനാലുകളിലെ മണ്ണും കാടും പടര്പ്പും തൊഴിലുറപ്പ് പദ്ധതിയില് നീക്കം ചെയ്യുന്നതിന് വിശദമായ എസ്റ്റിമേറ്റ് പഞ്ചായത്തുകള്ക്ക് നല്കണമെന്ന് എം. എല്. എമാര് ബന്ധപ്പെട്ട ഉദ്യോഗസ്ഥര്ക്ക് നിര്ദ്ദേശം നല്കി. ഇതുമായി ബന്ധപ്പെട്ട് മൂന്നിന് എ. ഡി. എമ്മിന്റെ അദ്ധ്യക്ഷതയില് യോഗം ചേരും.
വാട്ടര് അതോറിറ്റിയുടെയും കെ. എസ്. ഇ. ബിയുടെയും പ്രവൃത്തികളുമായി ബന്ധപ്പെട്ട എസ്റ്റിമേറ്റുകള് ഉടന് നല്കണമെന്ന് ജില്ലാ പഞ്ചായത്ത് പ്രസിഡന്റ് അന്നപൂര്ണാദേവി പറഞ്ഞു. കോഴഞ്ചേരി മണ്ണാറക്കുളഞ്ഞി റോഡ് സ്ഥിരം അപകട മേഖലയാണെന്നും ഇതിന് ഉടന് പരിഹാരമുണ്ടാവണമെന്നും വൈസ് പ്രസിഡന്റ് ജോര്ജ് മാമ്മന് കൊണ്ടൂര് പറഞ്ഞു. ജനപ്രതിനിധികള്, പോലീസ്, ആര്. ടി. ഒ, പഞ്ചായത്ത് അധികൃതര് എന്നിവര് സംയുക്ത പരിശോധന നടത്തണം. കോഴഞ്ചേരി പാലത്തില് വളരുന്ന ചെടികള് വേരോടെ നശിപ്പിക്കാന് നടപടിയുണ്ടാവണമെന്നും അദ്ദേഹം ആവശ്യപ്പെട്ടു. ജില്ലാ പ്ലാനിംഗ് ഓഫീസര് കമലാസനന് നായര്, വിവിധ വകുപ്പുതല മേധാവികള് തുടങ്ങിയവര് പങ്കെടുത്തു.
