പാറശ്ശാല: അതിര്ത്തി പ്രദേശങ്ങിലെ പെട്രോള് പമ്പ്, പച്ചക്കറി മാര്ക്കറ്റ്, വ്യാപാര സ്ഥാപനങ്ങള് എന്നിവിടങ്ങളില് പത്ത് രൂപ നാണയങ്ങള്ക്ക് അനധികൃത വിലക്ക്. ജില്ലയിലെ അതിര്ത്ഥി പ്രദേശമായ കളിയിക്കാവിളയിലാണ് പത്ത് രൂപ നാണയങ്ങള് നിരസിക്കാന് തുടങ്ങിയത്. പ്രദേശത്തെ വ്യാപാരികളാണ് അധികൃതമായി പത്തു രൂപയ്ക്ക് നിയന്ത്രണം ഏര്പ്പെടുത്തിയിരിക്കുന്നത്. മാര്ത്താണ്ഡം, കളിയിക്കാവിള, കുഴിത്തുറെ, ഊരമ്പ്, കൊല്ലങ്കോട്, കുറുംകുട്ടി, പൊഴിയൂര്, കാരക്കോണം, പളുകല്, പവതിയാന്വിള മൂവോട്ടുകോണം, പ്രദേശങ്ങളിലാണ് അനധികൃതമായി നിരോധനം ഏര്പ്പെടുത്തിയിരിക്കുന്നത്.
കറന്സി പിന്വലിക്കലിനെ തുടര്ന്ന് ബാങ്കുകളില് നിന്ന് കറന്സി മാറ്റിയവര്ക്കും തുക പിന്വലിച്ചവര്ക്കും ആയിരം രൂപയ്ക്ക് പത്തു രൂപയുടെ നൂറു നാണയങ്ങള് വീതം പൊതിയാക്കി നല്കിയിരുന്നു. ഇങ്ങനെ ലക്ഷകണക്കിന് രൂപയുടെ നാണയങ്ങാണ് പ്രദേശത്തെ ബാങ്കുകള് വഴി വിതരണം നടത്തിയത്. ഈ നാണയങ്ങളുമായി ജനങ്ങള് കടകളില് സാധനങ്ങള് വാങ്ങാന് പോകുമ്പോഴാണ് അനധികൃത വിലക്കിന്റെ കാര്യം അറിയുന്നത്. പത്തു രൂപ നാണയം സ്വീകരിക്കാതിരുന്ന പെട്രോള് പമ്പുകളില് ബിജെപി പ്രവര്ത്തകര് ഇടപെട്ട് നാണയം സ്വീകരിക്കാനുള്ള നടപടികള് സ്വീകരിച്ചു. പരശുവയ്ക്കല് പെട്രോള് പമ്പില് നാണയം സ്വീകരിക്കാന് കൂട്ടാക്കാത്തതിനെ തുടര്ന്ന് പാറശാല പോലീസില് പരാതി നല്കി. തുടര്ന്ന് പോലീസ് എത്തി നാണയം സ്വീകരിക്കണമെന്ന് പമ്പ് ഉടമയോട് ആവശ്യപ്പെടുകയും നാണയം സ്വീകരിക്കില്ലെന്ന് പ്രദര്ശിപ്പിച്ച ബോര്ഡ് നീക്കം ചെയ്യാനും ആവശ്യപ്പെട്ടു.
