ന്യൂദല്ഹി: ഗോവയ്ക്ക് പിന്നാലെ ദല്ഹിയിലും വന് വിമാന ദുരന്തം ഒഴിവായി. വിമാനങ്ങള് നേര്ക്കുനേര് വന്നുവെന്ന് ഡിജിസിഎ അറിയിച്ചു. ഇന്ഡിഗോ, സ്പൈസ് ജെറ്റ് വിമാനങ്ങളാണ് നേര്ക്കുനേര് എത്തിയത്. പൈലറ്റുമാരുടെ സമയോചിതമായ ഇടപെടലാണ് വന് ദുരന്തം ഒഴിവാക്കിയത്. ദല്ഹി ഇന്ദിരാ ഗാന്ധി ഇന്റര്നാഷണല് എയര്പ്പോര്ട്ടിലാണ് സംഭവം.
ലക്നൗവില് നിന്ന് എത്തിയ ഇന്ഡിഗോ വിമാനം ലാന്ഡ് ചെയ്തതിന് പിന്നാലെ സ്പൈസ് ജെറ്റ് വിമാനം പറന്നുയരാനായി റണ്വേയിലേക്ക് എത്തുകയായിരുന്നു. എയര് ട്രാഫിക് കണ്ട്രോളിന്റെ ഭാഗത്തുനിന്നുണ്ടായ പിഴവാണ് സംഭവത്തിന് കാരണമെന്നാണ് പ്രാഥമിക വിവരം.
സംഭവത്തേപ്പറ്റി അന്വേഷിക്കാന് ഡയറക്ടറേറ്റ് ജനറല് ഓഫ് സിവില് ഏവിയേഷന് ഉത്തരവിട്ടിട്ടുണ്ട്. ഇന്ന് പുലര്ച്ചെ ഗോവയിലെ ഡാബോലിം വിമാനത്താവളത്തില് ജെറ്റ് എയര്വേസ് വിമാനം റണ്വെയില് നിന്ന് തെന്നിമാറിയിരുന്നു.
