ന്യൂദല്ഹി: കള്ളപ്പണം സ്വമേധയാ വെളിപ്പെടുത്താനുള്ള പ്രധാനമന്ത്രി ഗരീബ് കല്യാണ് യോജന പദ്ധതി മാര്ച്ച് 31 വരെ. അമ്പത് ശതമാനം പിഴ നല്കിയാണ് കള്ളപ്പണം വെളിപ്പെടുത്താവുക. 25 ശതമാനം തുക നാല് വര്ഷത്തേക്ക് പിന്വലിക്കാനുമാകില്ല.
കള്ളപ്പണക്കാരെ പിടികൂടാന് സര്ക്കാര് ജനങ്ങളുടെ സഹായവും തേടി. എന്തെങ്കിലും വിവരം ലഭിക്കുന്നവര് [email protected] എന്ന ഇ മെയിലിലൂടെ സര്ക്കാരിന് കൈമാറണമെന്ന് റവന്യൂ സെക്രട്ടറി ഹസ്മുഖ് ആധ്യ ആവശ്യപ്പെട്ടു.
അസാധുവാക്കിയ നോട്ടുകള് ഈ മാസം 31 വരെയാണ് ബാങ്കില് നിക്ഷേപിക്കാനാവുക. എന്നാല് പദ്ധതിയില് പണം നിക്ഷേപിക്കുന്നതിന് ഇത് തടസ്സമാകില്ല. കള്ളപ്പണക്കാര്ക്ക് മാപ്പ് നല്കലല്ല പദ്ധതിയെന്നും കള്ളപ്പണ സംവിധാനത്തില് നിന്ന് പുറത്ത് കടക്കാനുള്ള അവസാന വാതിലാണെന്നും അദ്ദേഹം അഭിപ്രായപ്പെട്ടു.
നോട്ട് റദ്ദാക്കിയതിന് ശേഷമുള്ള മുഴുവന് ബാങ്ക് നിക്ഷേപങ്ങളും പരിശോധിക്കും. ബാങ്കില് നിക്ഷേപിച്ചാല് പണം നിയമവിധേയമാകുമെന്ന് അര്ത്ഥമില്ല. നികുതിയടക്കുന്നത് വരെ നിക്ഷേപങ്ങള് നിയമവിധേയമല്ല. അദ്ദേഹം ചൂണ്ടിക്കാട്ടി.
