ആലപ്പുഴ: അഴിമതിയിലും കെടുകാര്യസ്ഥതയിലും മുങ്ങിക്കിടക്കുന്ന കേരളാ സ്റ്റേറ്റ് കയര് കോര്പറേഷന് മാനേജിങ്ങ് ഡയറക്ടര്ക്ക് കാലാവധി നീട്ടിക്കൊടുക്കാന് ധനമന്ത്രി തോമസ് ഐസക് വ്യഗ്രത കാണിക്കുന്നത് എന്തിനാണെന്ന് പൊതുജനങ്ങളോട് പറയണമെന്ന് ബിജെപി ആലപ്പുഴ നിയോജകമണ്ഡലം പ്രസിഡന്റ് ജി. വിനോദ് കുമാര് ആവശ്യപ്പെട്ടു.
കേരളാ സ്പിന്നേഴ്സ് പ്രവര്ത്തിപ്പിക്കുന്നതിന് ഒരുനടപടിയും സ്വീകരിക്കാത്ത മന്ത്രിയാണ് ഇപ്പോള് 65 വയസ്സ് കഴിഞ്ഞവര്ക്ക് പൊതുമേഖലാ സ്ഥാപനങ്ങളുടെ തലപ്പത്ത് നിയമനം നല്കേണ്ടന്ന ഇടതുമുന്നണിയുടെ പൊതു തീരുമാനത്തിനു വിരുദ്ധമായി ഈ നീക്കം നടത്തുന്നത്.
പാവപെട്ട പൊതുജനത്തിന്റെ ധനം ധൂര്ത്തടിക്കുന്ന വെള്ളാനയായ കയര് കോര്പറേഷനിലെ നിയമനങ്ങളും, ഇടപാടുകളും എല്ലാം സുതാര്യതയില്ലാതെ അഴിമതിയുടെ നിഴലിലാണ്. ഇപ്പോള് ആവശ്യമില്ലാഞ്ഞിട്ടും പുതുതായി നിയമനങ്ങള്ക്ക് അപേക്ഷ ക്ഷണിച്ചിട്ടുണ്ട്. അതിന്റെ മറവില് തങ്ങളുടെ ആളുകളെ തിരുകിക്കയറ്റാനാണ് ഇവരുടെ നീക്കം.
കെടുകാര്യസ്ഥതയാണ് ഇവിടെ നടമാടുന്നത്. ഇതിന് കുടപിടിക്കാനാണ് തന്റെ ആജ്ഞാനുവര്ത്തിയായ മാനേജിങ്ങ് ഡയറക്ടര്ക്ക് കാലാവധി നീട്ടികൊടുക്കാന് അദ്ദേഹം വ്യഗ്രത കാണിക്കുന്നത്.
ഇതില്നിന്നും പിന്മാറിയില്ലെങ്കില് ഇതിനെതിരെ ശക്തമായ പ്രതിക്ഷേധ പരിപാടികള് സംഘടിപ്പിക്കുവാന് ബിജെപി തീരുമാനിച്ചു.
