ന്യൂദല്ഹി: വിദേശകാര്യ മന്ത്രി സുഷമ സ്വരാജിന്റെ ജനസേവനത്തിന് ആഗോള അംഗീകാരം. ട്വിറ്ററിലൂടെ ജനകീയ പ്രശ്നങ്ങളിലെ സുഷമയുടെ ഇടപെടലുകള് മുന്നിര്ത്തി ഫോറിന് പോളിസി മാഗസിന് അവരെ 2016 ലെ ഗ്ലോബല് തിങ്കര്-ഡിസിഷന് മേക്കേഴ്സ് 2016 പട്ടികയില് ഉള്പ്പെടുത്തി.
വിദേശകാര്യമന്ത്രിയെന്ന നിലയില് നയതന്ത്ര മേഖലയിലും സൗദിയില് ജോലി നഷ്ടപ്പെട്ട പ്രവാസികള്ക്കായി നടത്തിയ ഇടപെടലുകളും പരിഗണിച്ചാണ് സുഷമ സ്വരാജിനെ പട്ടികയില് ഉള്പ്പെടുത്തിയത്. യെമനും ഇറാഖും അടക്കമുളള യുദ്ധമേഖലകളില് അകപ്പെട്ടുപോയ നഴ്സുമാര് ഉള്പ്പെടെയുളള പ്രവാസികളായ ജോലിക്കാരെ തിരികെയെത്തിക്കാന് നടത്തിയ ശ്രമങ്ങളും കണക്കിലെടുത്തു.
ഇത്തരം ഇടപെടലുകളിലൂടെ ട്വിറ്റര് നയതന്ത്രം എന്ന പുതിയ രീതിക്കാണ് സുഷമ തുടക്കം കുറിച്ചിരിക്കുന്നതെന്ന് മാഗസിന് ചൂണ്ടിക്കാട്ടി. യുഎസ് പ്രസിഡന്റ് സ്ഥാനാര്ഥിയായിരുന്ന ഹില്ലരി ക്ലിന്റണ്, ജര്മന് ചാന്സലര് ആഞ്ചല മെര്ക്കല്, യുഎന് സെക്രട്ടറി ജനറല് ബാന് കി മൂണ്, കനേഡിയന് പ്രധാനമന്ത്രി ജസ്റ്റിന് ട്രൂഡു എന്നിവര് അടക്കം 15 പേരാണ് പട്ടികയില് ഉളളത്.
സൗദിയില് ജോലി നഷ്ടപ്പെട്ട പ്രവാസികള്ക്ക് ശമ്പളമില്ലാതിരുന്ന സമയത്ത് ഇന്ത്യന് എംബസി റേഷന് വിതരണം ചെയ്തതും അവരുടെ ശമ്പളം വാങ്ങി നല്കാനും വീട്ടിലെത്തിക്കാനും സര്ക്കാര് നടത്തിയ പ്രവര്ത്തനങ്ങള് മന്ത്രിയെന്ന നിലയില് സുഷമ സ്വരാജ് ക്രോഡീകരിച്ചതും ട്വിറ്ററിലൂടെയാണെന്ന് മാഗസിന് ചൂണ്ടിക്കാട്ടി.
യെമനില് നിന്നും പാസ്പോര്ട്ട് ഉള്പ്പെടെ നഷ്ടപ്പെട്ടവരെ തിരികെയെത്തിക്കാന് സുഷമ നടത്തിയ സേവനങ്ങള് കാണാതിരിക്കാനാകില്ല. ഇത്തരം ജനകീയ പ്രവര്ത്തനങ്ങളിലെ ഇടപെടല് സാധാരണ ട്വിറ്റര് ഉപയോക്താക്കളുടെ നേതാവെന്ന ഖ്യാതിയാണ് സുഷമയ്ക്ക് നേടിക്കൊടുത്തിട്ടുളളതെന്ന് മാഗസിന് വിലയിരുത്തി. 6.81 മില്യന് ഫോളോവേഴ്സ് ആണ് ട്വിറ്ററില് സുഷമയെ പിന്തുടരുന്നത്.
