പുനലൂര്: കേരളത്തില് പരമ്പരാഗതമായ രീതിയില് കരിമരുന്ന് കലയെ ജനകീയമാക്കി മാറ്റിയ കടയ്ക്കല്, അയിരക്കുഴി പുരുഷോത്തമന് ആശാന്(90) ഇനി ഓര്മ. കുറച്ചുനാള് മുമ്പുവരെ കമ്പക്കെട്ടിനും മറ്റും സജീവമായി പങ്കെടുത്തിരുന്ന ആശാന് കേരളത്തിലെ ഏറ്റവും പ്രായം ചെന്ന വെടിക്കെട്ട് ആശാന് എന്ന ഖ്യാതി നേടിയിട്ടുണ്ട്.
മുന്ഗാമികളില് നിന്നും പരമ്പരാഗതമായി സ്വായത്തമാക്കിയ കരിമരുന്ന് നിര്മാണവൈദഗ്ധ്യത്തിലൂടെ ആശാന് നാടിന്റെ അങ്ങോളമിങ്ങോളം വ്യത്യസ്തമേഖലകളിലായി ആകാശദൃശ്യവിരുന്ന് സൃഷ്ടിച്ചു. കേരളത്തിനകത്തും പുറത്തുമായി നടന്ന വെടിക്കെട്ട് മത്സരങ്ങളിലെല്ലാം വിജയം വരിച്ചിരിക്കുന്ന പുരുഷോത്തമനാശാന് ഇന്ന് മേഖലയില് വന്ശിഷ്യസമ്പത്തുള്ളയാളാണ്. ക്ഷേത്രങ്ങള്ക്ക് പുറമെ കേരളത്തിലെ പ്രസിദ്ധങ്ങളായ മണര്കാട്, പാലയിലെ കടനാട്, പത്തനംത്തിട്ട മയിലപ്ര പള്ളികള്, ബാംഗ്ലൂരിലെ ഉത്സവ ഫെസ്റ്റുകള് എന്നിവിടങ്ങളിലെല്ലാം വെടിക്കെട്ട് വൈദഗ്ധ്യം തെളിയിച്ചിട്ടുണ്ട്.
പടക്കനിര്മാണമെന്നത് സീസണ് തൊഴില് ആയപ്പോഴും ആശാനൊപ്പം പണിയെടുത്തിരുന്ന തൊഴിലാളികള്ക്ക് മറ്റ് തൊഴില്തേടി പോകേണ്ടിവന്നിട്ടില്ല. തൊഴിലാളികള് കുടുംബാംഗങ്ങളെ പോലെയാണ് ആശാന്. തൊഴിലാളികള്ക്ക് സ്ഥിരം സംവിധാനം ഉണ്ടാക്കാനും ആശാന് ശ്രദ്ധിച്ചിരുന്നു. തന്റെ വഴിയെ തന്റെ തലമുറയെ ഒരുപരിധി വരെ അകറ്റിനിര്ത്തുന്ന കാലത്ത് ആശാന് ഏകമകനായ സാബുവിനെ രംഗത്ത് കൊണ്ടുവന്നു. സുജാതയാണ് ഭാര്യ. മരുമകള് ആന്സി.
