ചക്കുളത്തുകാവ്: ചക്കുളത്തുകാവില് പൊങ്കാലയ്ക്ക് കേളി കൊട്ടായി. കാര്ത്തിക സ്തംഭം ഇന്ന് ഉയരും. രാവിലെ കാര്ത്തികസ്തംഭം ഒരുക്കുന്നതിനുള്ള കവുങ്ങിന് തടി എത്തിക്കും. കാര്ത്തികസ്തംഭം ഒരുക്കുന്നതിനുള്ള തടി നല്കുന്നത് നെടുമ്പ്രം കണിയാന്തറ വീട്ടില് കോമളന് ആണ്.
ഇതോടപ്പം പ്രവര്ത്തകര്ക്ക് ഭക്ഷണം ഉള്പ്പെടെ എല്ലാ സൗകര്യങ്ങളും ചെയ്തു കൊടുക്കുന്നുണ്ട്്. വൃതശുദ്ധിയോടെ ഇതിന് പങ്കെടുക്കുന്നവര് നാമ ജപ മന്ത്രങ്ങളാല് ഭക്തി സാന്ദ്രമായ അന്തരീക്ഷത്തില് വൃക്ഷം അനുവാദം വാങ്ങി മുറിച്ച് നിലം തൊടാതെ വാദ്യമേളങ്ങളുടേയും വായ്ക്കുരവകളുടെയും മുത്തുക്കുടകളുടേയും അകമ്പടിയോടെ ഉത്സവകമ്മറ്റി സെക്രട്ടറി സന്തോഷ് ഗോകുലത്തിന്റെ നേതൃത്വത്തില് ക്ഷേത്രത്തിലെത്തിക്കും.
ചടങ്ങുകള്ക്ക് ക്ഷേത്ര മുഖ്യകാര്യദര്ശി രാധാകൃഷ്ണന് നമ്പൂതിരി കാര്യദര്ശി മണിക്കുട്ടന് നമ്പൂതിരി എന്നിവര് നേതൃത്വം വഹിക്കും. ചെത്തി മിനുക്കി തയ്യാറാക്കി എടുക്കുന്ന കവുങ്ങില് തടിയില് ദേവിക്ക് കഴിഞ്ഞ ഒരുവര്ഷം ചാര്ത്തിയ ഉടയാടകളും, ഉണങ്ങിയ തെങ്ങോലകളും, വാഴയിലയും, കവുങ്ങിന്പാളയും വച്ചു കെട്ടിയാണ് സ്തംഭം തയ്യാറാക്കുന്നത്. വൈകിട്ട് ദീപാരാധനയോടെ സ്തംഭം ഉയര്ത്തല് ചടങ്ങും നടക്കും.
കാര്ത്തിക നാളില് ദീപാരാധനയ്ക്കു ശേഷം സ്തംഭം കത്തിക്കല് ചടങ്ങ് തിന്മയെ അഗ്നിക്കിരയാക്കി നന്മയുടെ പ്രകാശം വിതറുക എന്ന ഐതീഹ്യമാണ് ഇതിനു പിന്നില്. കാര്ത്തിക സ്തംഭം കത്തിക്കുന്ന ചടങ്ങ് യുഎന് വിദഗ്ധ സമിതി ചെയര്മാന് ഡോ. സി.വി. ആനന്ദബോസാണ് നിര്വഹിക്കുന്നത്.
