കണ്ണൂര്: ഡിസംബര് എട്ടി ന് സംസ്ഥാന വ്യാപകമായി നടക്കുന്ന ഹരിതകേരള മിഷ ന്റെ ഭാഗമായി ജില്ലയിലെ ആയിരത്തിലേറെ വാര്ഡ്-ഡിവിഷനുകളിള് വിവിധ ശുചീകരണ-ജലസംരക്ഷണ പദ്ധതികള് നടപ്പാക്കുമെന്ന് ജില്ലാപഞ്ചായത്ത് പ്രസിഡന്റ് കെ.വി സുമേഷ് വാര്ത്താസമ്മേളനത്തില് അറിയിച്ചു. പരിപാടികളില് പ്രദേശത്തെ എല്ലാവിഭാഗം ആളുകളുടെയും സഹകരണം ഉറപ്പാക്കും. ഇതിനായി തദ്ദേശസ്വയംഭരണ സ്ഥാപനങ്ങള് വാര്ഡ് തലത്തില് പ്രത്യേക സംഘാടക സമിതിക്ക് രൂപം നല്കിയിട്ടുണ്ട്.
ഹരിതകേരള മിഷന്റെ ജില്ലാതല ഉദ്ഘാടനം പുരാതനമായ ചിറക്കല് ചിറ ശുചീകരണത്തിലൂടെ നിര്വഹിക്കും. ഡിസംബര് എട്ടിന് രാവിലെ എട്ട് മണിക്ക് ആരംഭിക്കുന്ന പരിപാടിയില് ആരോഗ്യവകുപ്പ് മന്ത്രി കെ.കെ ശൈലജടീച്ചര്, തുറമുഖ വകുപ്പുമന്ത്രി രാമചന്ദ്രന് കടന്നപ്പള്ളി, ജനപ്രതിനിധികള്, രാജകുടുംബാംഗങ്ങള്, സാമൂഹ്യ- സാംസ്കാരിക രംഗത്തെ പ്രമുഖര് തുടങ്ങിയവര് സംബന്ധിക്കും. 3000 വളണ്ടിയര്മാരുടെ സഹായത്തോടെയാണ് ചിറയിലെ മാലിന്യങ്ങള് നീക്കം ചെയ്യുക. ചിറയിലെ വെള്ളം കുറയുന്ന മുറയ്ക്ക് ചെളി നീക്കംചെയ്യും. ഇക്കാര്യത്തില് ചിറക്കല് രാജകുടുംബം പൂര്ണ സഹകരണം ഉറപ്പുനല്കിയതായും ജില്ലാ പഞ്ചായത്ത് പ്രസിഡന്റ് പറഞ്ഞു.
എട്ടിന് എല്ലാ വിദ്യാലയങ്ങളിലും മിഷന് പ്രവര്ത്തനങ്ങള് സംഘടിപ്പിച്ചിട്ടുണ്ട്. ഇതിന്റെ മുന്നോടിയായി എല്ലാ സ്കൂളുകളിലും പ്രത്യേക അസംബ്ലി ചേര്ന്നതായും അദ്ദേഹം പറഞ്ഞു.
ഹരിതകേരള മിഷന്റെ ഭാഗമായി ജില്ലയൊട്ടാകെ എട്ടിന് പ്ലാസ്റ്റിക് ഹര്ത്താല് ആചരിക്കുമെന്ന് ജില്ലാ കലക്ടര് മീര് മുഹമ്മദ് അലി പറഞ്ഞു. വ്യക്തികളും സ്ഥാപനങ്ങളും ആ ദിവസം പ്ലാസ്റ്റിക് കാരിബാഗുകള് ഉപയോഗിക്കില്ലെന്ന് തീരുമാനിക്കണം. ഹരിതകേരള മിഷന്റെ ഭാഗമായി ഡിസംബര് ഒന്നു മുതല് ജില്ലയിലെ മുഴുവന് സര്ക്കാര്-സ്വകാര്യ വിദ്യാലയങ്ങളും വൃത്തിയാക്കിയ പ്ലാസ്റ്റിക് മാലിന്യങ്ങള് വിദ്യാര്ഥികളിലൂടെ ശേഖരിക്കാന് ആരംഭിച്ചുകഴിഞ്ഞു. ഡിസംബര് എട്ടിന് ശേഷമുള്ള എല്ലാ ബുധനാഴ്ചകളും ശേഖരണ ദിനമായി തീരുമാനിച്ചിട്ടുണ്ട്. ഇങ്ങനെ ലഭിക്കുന്ന പ്ലാസ്റ്റിക് മാലിന്യങ്ങള് സംസ്ക്കരണ കേന്ദ്രങ്ങളിലേക്കയക്കാന് തദ്ദേശ സ്ഥാപന ങ്ങള് പദ്ധതി തയ്യാറാക്കും.
എട്ടിന് നടക്കുന്ന പരിപാടികള് മിഷന് പ്രവര്ത്തനങ്ങളുടെ തുടക്കം മാത്രമാണ്. ഏപ്രില് രണ്ടോടെ ജില്ലയെ പ്ലാസ്റ്റിക് വിമുക്തജില്ലയാക്കാനുദ്ദേശിച്ചുള്ള പ്ലാസ്റ്റിക് രഹിത കണ്ണൂര്- നല്ല മണ്ണ് നല്ല നാട് കാംപയിന്റെ ഭാഗമായി എട്ടോ ടെ ജില്ലയിലെ മുഴുവന് തദ്ദേശ സ്ഥാപനങ്ങളും ഡിസ്പോസബ്ള് ഫ്രീ പ്രഖ്യാപനം നടത്തും. മിക്ക സ്ഥാപനങ്ങളും ഈ നേട്ടം ഇതിനകം കൈവരിച്ചുകഴിഞ്ഞതായും ജില്ലാ കലക്ടര് അറിയിച്ചു. വിവാഹമുള്പ്പെടെ നാട്ടില് നടക്കുന്ന എല്ലാ ചടങ്ങുകളും ഡിസ്പോസബ്ള് രഹിതമാക്കുമെന്ന പ്രഖ്യാപനവും ഡിസംബര് എട്ടിന് വാര്ഡ് തല മിഷന് പരിപാടിയില് നടത്തും.
ഹരിതകേരള മിഷന്റെ ഭാഗമായി കോര്പറേഷനിലെ കുന്നുകൂടിക്കിടക്കുന്ന മാലിന്യങ്ങള് നീക്കം ചെയ്ത് അവിടങ്ങളില് പുന്തോട്ടം നിര്മിക്കുമെന്ന് മേയര് ഇ.പി ലത പറഞ്ഞു. എട്ടിന് നടക്കുന്ന ശുചീകരണപ്രവൃത്തികളില് സ്കൂള് വിദ്യാര്ഥികളുള്പ്പെടെയുള്ളവരെ പങ്കാളികളാക്കും. ജനുവരി മുതല് തന്നെ കോര്പറേഷന് പരിധിയില് പ്ലാസ്റ്റിക് കാരി ബാഗുകള് നിരോധിക്കുമെന്നും മേയര് അറിയിച്ചു.
ഹരിതകേരള മിഷന് ജില്ല കണ്ട ഏറ്റവും വലിയ ജനകീയ പരിപാടിയാക്കുകയാണ് ലക്ഷ്യമെന്ന് ജില്ലാ പഞ്ചായത്ത് പ്രസിഡന്റ് പറഞ്ഞു. ഇതിന്റെ പ്രചരണാര്ഥം 6, 7 തീയതികളില് എല്ലാ വാര്ഡുകളിലും വിളംബര ജാഥകള് സംഘടിപ്പിക്കും. കുടുംബശ്രീ പ്രവര്ത്തകരും പ്രചാരണത്തില് പങ്കാളികളാവും.
കലക്ടറേറ്റ് പി.ആര് ചേംബറില് നടന്ന വാര്ത്താസമ്മേളനത്തില് ജില്ലാ പഞ്ചായത്ത് സ്റ്റാന്റിംഗ് കമ്മിറ്റി ചെയര്മാന് കെ.പി ജയബാലന് മാസ്റ്റര്, ഡി.ഡി.പി എം.എസ് നാരായണന് നമ്പൂതിരി, ജില്ലാ പ്ലാനിംഗ് ഓഫീസര് കെ പ്രകാശന് എന്നിവര് സംബന്ധിച്ചു.
