ആലപ്പുഴ: തലവടി കേന്ദ്രമായി പ്രവര്ത്തിക്കുന്ന സ്നേഹഭവന്റെ പ്രവര്ത്തനങ്ങളില് മനുഷ്യാവകാശ ലംഘനവും തട്ടിപ്പും നടക്കുന്നതായി കീഴ്വായ്പൂര് കാവുങ്കല് വീട്ടില് ആനി കെ.ജോസഫ് പത്രസമ്മേളനത്തില് കുറ്റപ്പെടുത്തി. ഇതു സംബന്ധിച്ച് മുഖ്യമന്ത്രി, ഓര്ഫനേജ് കണ്ട്രോള് ബോര്ഡ്, വിജിലന്സ് തുടങ്ങിയവര്ക്ക് പരാതി നല്കിയതായും അവര് പറഞ്ഞു.
ആനിയും കുടുംബവും സൗജന്യമായി നല്കിയ 45 സെന്റ് ഭൂമിയിലും കെട്ടിടത്തിലുമാണ് നിലവില് സ്നേഹഭവന് പ്രവര്ത്തിക്കുന്നത്. ശാലോം കാരുണ്യ ട്രസ്റ്റിനാണ് ഭൂമിയും കെട്ടിടവും നല്കിയത്. ഇവരുടെ നിയന്ത്രണത്തിലാണ് തലവടിയില് സ്നേഹഭവന് പ്രവര്ത്തനം തുടങ്ങിയത്. കാലക്രമേണ വന് അഴിമതിയും മനുഷ്യാവകാശ ലംഘനവുമാണ് ഇവിടെ നടക്കുന്നതെന്ന് അവര് ആരോപിച്ചു.
അനധികൃതമായി ഇവിടെ കെട്ടിടങ്ങള് നിര്മ്മിച്ചിട്ടുണ്ട്. 50 പേരെ പോലും താമസിപ്പിക്കാനുള്ള സൗകര്യം ഇവിടെയില്ല. എന്നാല് 200ലേറെ പേരെയാണ് ഇപ്പോള് ഇവിടെ താമസിപ്പിക്കുന്നത്. കുടാതെ അന്തേവാസികളായ സ്ത്രീകള്ക്ക് യാതൊരു സുരക്ഷിതത്വവുമില്ല. പരിസരമലിനീകരണവും രൂക്ഷമാണ്.
