ടീമംഗങ്ങള് വിമാനത്തില്. യാത്രയ്ക്കിടെ എടുത്ത ചിത്രം
റിയൊ ഡി ജനീറൊ: ബ്രസീലിയന് ഫുട്ബോളിലെ കേമന്മാരൊന്നുമല്ല ചാപ്കൊയെന്സ് ഫുട്ബോള് ക്ലബ്. കാനറികളുടെ ദേശീയ താരങ്ങളൊന്നുമില്ല ടീമില്. ഏങ്കിലും അവരുടെ താരങ്ങള് അപകടത്തില്പ്പെട്ടപ്പോള് കായികലോകം കരഞ്ഞു. കൊളംബിയയില് തകര്ന്നുവീണ വിമാനത്തോടൊപ്പം പൊലിഞ്ഞവരില് ഒരുപക്ഷേ ഭാവിയിലെ താരങ്ങളുമുണ്ടാകാം. ദേശീയ ടീമില് കളിച്ച യുവതാരങ്ങള് ടീമിലുണ്ടെന്നാണ് വിവരം. ബ്രസീലിയന് ഫുട്ബോളിന്റെ മുന്നിരയിലെത്തി നിലയുറപ്പിക്കും മുന്പ് നിലംപതിച്ചു ടീം.
ബ്രസീലിലെ ലെസ്റ്റര് എന്നാണ് ചാപ്കൊയെന്സ് അറിയപ്പെടുന്നത്. ബ്രസീലിയന് ഫുട്ബോളിന്റെ പാരമ്പര്യമൊന്നും അവകാശപ്പെടാനില്ല 1973ല് സ്ഥാപിതമായ ക്ലബ്ബിന്. 2014ലാണ് നാലാം ഡിവിഷനില് നിന്ന് ബ്രസീല് സീരി എയിലേക്ക് (ഫസ്റ്റ് ഡിവിഷന്) സ്ഥാനക്കയറ്റം ലഭിച്ചത്. ഇത്തവണ ലാറ്റിനമേരിക്കയിലെ രണ്ടാം നിര ക്ലബ് ടൂര്ണമെന്റ് (യൂറോപ്പിലെ യുറോപ്പ ലീഗിനു സമം) കോപ സുഡഅമേരിക്കന് കപ്പ് ഫൈനലിലെത്തിയതോടെ വന്കരയുടെ ആകെ ശ്രദ്ധാകേന്ദ്രമായി ടീം. അര്ജന്റീനയില് നിന്നുള്ള സാന് ലോറെന്സൊയെ സെമിയില് കീഴടക്കി ചാപ് ഫൈനലിലെത്തിയത്. എതിരാളി കൊളംബിയന് ടീം അത്ലറ്റികോ നാഷണല്. ഇരുപാദ ഫൈനലിലെ ആദ്യത്തേതിനാണ് ടീം കൊളംബിയയിലേക്ക് വിമാനം കയറിയത്.
ആഘോഷപൂര്വമായിരുന്നു യാത്ര. ബൊളീവിയന് വിമാനക്കമ്പനിയായ ലാമിയയുടെ വിമാനം ചാര്ട്ട് ചെയ്താണ് ടീം പറന്നത്. കളിക്കാര്ക്കും ഒഫീഷ്യല്സിനും പുറമെ മാധ്യമപ്രവര്ത്തകരുമുണ്ടായിരുന്നു വിമാനത്തില്. ഇവരില് ചിലര് രക്ഷപ്പെട്ടെന്ന് വാര്ത്തകളുണ്ടെങ്കിലും സ്ഥിരീകരിച്ചിട്ടില്ല. യാത്രയയപ്പ് ആഘോഷമാക്കിയ ആരാധകര് ഇന്നലെ ക്ലബ്ബിന്റെ ഹോം ഗ്രൗണ്ട് അരീന കോണ്ടയില് ഒത്തുചേര്ന്നത് ഞെട്ടലോടെ. പ്രിയ താരങ്ങളില് പലരും ഇനിയില്ലെന്ന യാഥാര്ത്ഥ്യം ഉള്ക്കൊള്ളാനായിട്ടില്ല പലര്ക്കും. ക്ലബ്ബിന്റെ നേട്ടങ്ങളുടെ ചിത്രങ്ങളും ബാനറുകളുമായാണ് അവരെത്തിയത്.
ചാപ്കൊയെന്സ് ക്ലബ്ബിന്റെ സ്റ്റേഡിയത്തിനു മുന്നില് എത്തിയ ആരാധകര്
പ്രാദേശിക ഫുട്ബോളില് പ്രശസ്തനായ കായൊ ജൂനിയറാണ് ടീമിന്റെ പരിശീലകന്. നായകന് ക്ലെബര് സന്റാനയ്ക്ക് യൂറോപ്യന് പരിചയമുണ്ട്. 2007-2010ല് സ്പാനിഷ് ടീം അത്ലറ്റികോ മാഡ്രിഡില് കളിച്ചു. സെര്ജിയൊ അഗ്വെയ്റൊയും ഡേവിഡ് ഡി ഗിയയുമൊക്കെ ഒപ്പമുണ്ടായിരുന്നു. ജര്മന് ടീം ഹൊഫെന്ഹെയിമില് നിന്ന് വായ്പയിലെത്തിയ ഡിഫന്സീവ് മിഡ്ഫീല്ഡര് മാത്യൂസ് ബിറ്റെകൊ മറ്റൊരു പ്രമുഖന്. സെമിയില് വിജയ ഗോള് നേടിയ അനാനിയസ്, 2011 മുതല് 16 വരെ സ്പോര്ട്ടിങ് ലിസ്ബണില് കളിച്ച ഗോള്കീപ്പര് മാഴ്സെലോ ബോയെക്ക് എന്നിവരും ലാറ്റിനമേരിക്കയ്ക്ക് പുറത്ത് അറിയപ്പെടുന്നവര്.
സംഭവത്തില് ലാറ്റിനമേരിക്കന് ഫുട്ബോള് അസോസിയേഷന് ദുഃഖം രേഖപ്പെടുത്തി. ഇനിയൊരറിയിപ്പുണ്ടാകുന്നതു വരെ മേഖലയിലെ ഫുട്ബോള് മത്സരങ്ങളും റദ്ദാക്കി. അപകടത്തില് മരിച്ചവര്ക്ക് കായികലോകവും ആദരാഞ്ജലിയര്പ്പിച്ചു. റയല് മാഡ്രിഡ്, ബാഴ്സലോണ തുടങ്ങിയ പ്രമുഖ ക്ലബ്ബുകള് പരിശീലന സമയത്ത് ഒരു മിനിറ്റ് മൗനമാചരിച്ചു.
ഗരത് ബെയ്ല്, വെയ്ന് റൂണി അടക്കം പ്രമുഖരെല്ലാം താരങ്ങള്ക്ക് ആദരാഞ്ജലി അര്പ്പിച്ചു. മറ്റു കായികയിനങ്ങളിലെ താരങ്ങളും അനുശോചിച്ചു.
