കൊരാപത്: പോലീസിന് വിവരങ്ങള് ചോര്ത്തിക്കൊടുക്കുന്നുവെന്ന് സംശയിച്ച് മാവോയിസ്റ്റുകള് ഒരു ഗ്രാമീണനെ കൊന്നു. റോഡ് നിര്മാണത്തിലേര്പ്പെട്ടിരുന്ന അഞ്ചോളം വാഹനങ്ങള് കത്തിച്ചതായും ഒഡിഷയിലെ കൊരാപത് ജില്ലയിലെ ഒരു മുതിര്ന്ന പോലീസുദ്യോഗസ്ഥന് പറഞ്ഞു.
പൊട്ടന്ഗി പോലീസ് സ്റ്റേഷന്റെ പരിധിയില് പ്രവര്ത്തിക്കുന്ന നിര്മാണക്കമ്പനിയുടെ ക്യാമ്പിലേക്ക് ഒരു സംഘം മാവോയിസ്റ്റുകള് അതിക്രമിച്ച് കടന്ന് അക്രമം അഴിച്ച് വിടുകയായിരുന്നു. ചില തൊഴിലാളികളെയും ഗ്രാമവാസികളെയും കൊടും കാട്ടിലേക്ക് കൊണ്ടുപോകുകയും ചെയ്തു. റോഡ് നിര്മാണത്തെ പിന്തുണച്ചാല് ഗുരുതരമായ പ്രത്യാഘാതങ്ങളുണ്ടാകുമെന്ന താക്കീതോടെ വൈകിട്ട് ഇവരെ വിട്ടയച്ചു.
സംഭവത്തെക്കുറിച്ച് പോലീസിന് വിവരം നല്കുമെന്ന് ഭയന്ന് നാട്ടുകാരുടെ മൊബൈല് സിം കാര്ഡുകളും മാവോയിസ്റ്റുകള് തട്ടിയെടുത്തു. വീണ്ടും രാത്രിയോടെ ക്യാമ്പിലെത്തിയ മാവോകള് വാഹനങ്ങള് കത്തിക്കുകയായിരുന്നു. പിന്നീട് ജയറാം ഖിലോ എന്നൊരാളെ കൊല്ലുകയുമായിരുന്നു.
