ഇരിട്ടി: തില്ലങ്കേരി കുണ്ടരിഞ്ഞാലിലെ ആര്എസ്എസ് പ്രവര്ത്തകന് വിനീഷ് വധക്കേസില് പോലീസിന് പിടികൊടുക്കാതെ ഒളിവിലാണെന്ന് പറയുന്ന പ്രതി ബിജെപി പ്രവര്ത്തകനെ കൊല്ലുമെന്ന് ഭീഷണിപ്പെടുത്തിയതായി പോലീസില് പരാതി നല്കി. വിനീഷ് വധക്കേസില് പിടികൊടുക്കാതെ ഒളിവിലാണെന്ന് പറയുന്ന പ്രതി പി.പി.രാജേഷും, മറ്റൊരു സിപി എം പ്രവര്ത്തകനായ ജിജോവും ചേര്ന്ന് വഴിയില് തടഞ്ഞുനിര്ത്തി തന്നെ ഭീഷണിപ്പെടുത്തി എന്നാണ് തില്ലങ്കേരി കുണ്ടരിഞ്ഞാലിലെ കൈതേരി രവീന്ദ്രന് ഇരിട്ടി ഡിവൈഎസ്പി, സി ഐ, മുഴക്കുന്ന് എസ്ഐ എന്നിവര്ക്ക് നല്കിയ പരാതിയില് പറയുന്നത്.
ചൊവ്വാഴ്ച രാത്രി 10 മണിയോടെയായിരുന്നു പരാതിക്കടിസ്ഥാനമായ സംഭവം നടന്നത്. തില്ലങ്കേരി കുട്ടിമാവിന് കീഴില് ബിജെപി സംസ്ഥാന സെക്രട്ടറി എം.ടി.രമേഷ്, വത്സന് തില്ലങ്കേരി മുതലായവര് പങ്കെടുത്ത ബിജെപി പൊതുയോഗം കഴിഞ്ഞ് രവീന്ദ്രന് വീട്ടിലേക്കു നടന്നു പോകവേ മാരകായുധങ്ങളുമായി എത്തിയ രാജേഷും ജിജോവും ‘എവിടെക്കാടാ പോവുന്നത്’ എന്നാക്രോശിച്ചു കൊണ്ട് കഴുത്തിന് നേരെ കൊടുവാള് വെച്ച് നിന്നെയും ‘നിന്റെ കുടുംബത്തെയും പച്ചയോടെ കത്തിക്കുമെന്നും വീട്ടില് കിടത്തിയുറക്കില്ലെന്നും വീടടക്കം കത്തിക്കുമെന്നും’ ഭീഷണിപ്പെടുത്തുകയായിരുന്നുവെന്ന് പോലീസില് നല്കിയ പരാതിയില് പറയുന്നു. ഇപ്പോള് തില്ലങ്കേരി പഞ്ചായത്ത് പ്രസിഡന്റ്ആയ പി.പി.സുഭാഷിന്റെ സഹോദരനാ ണ് രാജേഷ്. ജിജോവിന്റെ കാറിന് നേരെ ബോംബെറിഞ്ഞു എന്ന കള്ളക്കേസില് കുടുക്കി ജയിലില് അടച്ചിരിക്കുന്ന കുറുവ രതീഷിന്റെ പിതാവാണ് ഇവര് ഭീഷണിപ്പെടുത്തിയ കൈതേരി രവീന്ദ്രന്. സംഭവത്തെക്കുറിച്ച് സമഗ്രമായ അന്വേഷണം നടത്തി കുറ്റക്കാര്ക്കെതിരെ ശക്തമായ നിയമ നടപടി കൈക്കൊള്ളണമെന്നാണ് രവീന്ദ്രന് പോലീസില് നല്കിയ പരാതിയില് ആവശ്യപ്പെടുന്നത്.
