കണ്ണൂര്: 500,1000 രൂപ നോട്ടുകള് അസാധുവാക്കിയതിനെ തുടര്ന്ന് നോട്ടുകള് മാറ്റിവാങ്ങാനും പണം നിക്ഷേപിക്കാനും ബാങ്കുകളിലും പോസ്റ്റോഫീസുകളിലും കഴിഞ്ഞ ഒരാഴ്ച കാലമായി അനുഭവപ്പെട്ടുവരുന്ന തിരക്ക് ജില്ലയിലെ ഒട്ടുമിക്ക സ്ഥലങ്ങളിലും കുറഞ്ഞു തുടങ്ങി. ബാങ്കുകളുടെ പ്രവര്ത്തനം സാധാരണ നിലയിലേക്ക് നീങ്ങിത്തുടങ്ങി. 500 രൂപ നോട്ടുകള് ഇന്ന് ജില്ലയില് എത്തുന്നതോടെ പ്രയാസങ്ങള് പൂര്ണ്ണമായും പരിഹരിക്കപ്പെടും.
മരവിപ്പിച്ച നോട്ടുകള് മാറ്റിവാങ്ങേണ്ടവര് എണ്പത് ശതമാനവും മാറ്റി വാങ്ങുകയും നിക്ഷേപിക്കേണ്ടവര് അക്കൗണ്ടുകളില് നിക്ഷേപിക്കുകയും ചെയ്തു കഴിഞ്ഞു. മാത്രമല്ല 10, 20, 50, 100 രൂപയുടെ നോട്ടുകള് ആവശ്യത്തിന് ബാങ്കുകളിലും പോസ്റ്റോഫീസുകളിലും വിതരണത്തിനെത്തിയതോടെ ചില്ലറ സംബന്ധിച്ച ക്ഷാമവും ഒരു പരിധിവരെ പരിഹരിക്കപ്പെട്ടിട്ടുണ്ട്. നഗരങ്ങളില് എടിഎമ്മുകളും ഭാഗികമായി പ്രവര്ത്തിക്കാന് തുടങ്ങിയത് ജനങ്ങള്ക്ക് ആശ്വാസമായിട്ടുണ്ട്.
ജില്ലാ ബാങ്ക് ഉള്പ്പെടെയുളള സഹകരണ ബാങ്കുകളില് പഴയ പണം സ്വീകരിക്കുകയോ ചെയ്യാത്തത് ഗ്രാമപ്രദേശങ്ങളില് ഇപ്പോഴും ജനങ്ങള്ക്ക് ചെറിയതോതില് ഇപ്പോഴും ബുദ്ധിമുട്ടുകള് ഉണ്ടാക്കുന്നുണ്ട്. ജില്ലാ ബാങ്കുകളില് വരും ദിവസങ്ങളില് പണം എത്തുന്നതോടെ ഇവ അക്കൗണ്ടുളള പ്രാഥമിക ബാങ്കുകള്ക്ക് ലഭ്യമാവുന്നതോടെ ഗ്രാമ പ്രദേശങ്ങളിലെ ബുദ്ധിമുട്ടുകള് പരിഹരിക്കപ്പെടും.
അതേസമയം നോട്ടുകള് അസാധുവാക്കിയ നടപടിക്കെതിരെ സംസ്ഥാനത്താകമാനം എല്ഡിഎഫും യുഡിഎഫും പോഷകസംഘടനകളും പോസ്റ്റോഫീസുകളിലേക്കും എസ്ബിഐയുള്പ്പെടെയുളള ബാങ്ക് ശാഖകളിലേക്കും കഴിഞ്ഞ ദിവസങ്ങളില് നടത്തിയ മാര്ച്ചുകളും ധര്ണ്ണകളും ജനങ്ങളെ സാരമായി ബാധിച്ചു. ബാങ്കുകളും പോസ്റ്റോഫീസുകളും ഉപരോധിച്ചത് പണം മാറ്റിവാങ്ങാനും ഇടപാടുകള്ക്കും എത്തിയ ജനങ്ങള്ക്ക് ഓഫീസുകളില് പ്രവേശിക്കാന് പ്രയാസം സൃഷ്ടിച്ചു. അകത്തു കയറിയവരാവട്ടെ പലയിടങ്ങളിലും പോലീസ് ഗേറ്റ് അടച്ചതിനാല് സമരം തീരുന്നതുവരെ പുറത്തുനില്ക്കേണ്ടി വന്നു. മാത്രമല്ല നോട്ടുമാറ്റാനും പണം നിക്ഷേപിക്കാനുമെത്തിയ ജനങ്ങള് അകത്തുകയറാനാവാതെ മണിക്കൂറുകളോളം ബുദ്ധിമുട്ടുകയും ചെയ്തു.
