മുംബൈ: രഞ്ജി ട്രോഫി ക്രിക്കറ്റ് ഗ്രൂപ്പ് സിയില് ഗോവയ്ക്കെതിരെ കേരളം മികച്ച ലീഡിലേക്ക്. ഗോവയെ 286 റണ്സിനു പുറത്താക്കി ആദ്യ ഇന്നിങ്സില് 56 റണ്സ് ലീഡ് നേടിയ കേരളം, മൂന്നാം ദിവസം കളിനിര്ത്തുമ്പോള് രണ്ടാമിന്നിങ്സില് നാല് വിക്കറ്റ് നഷ്ടത്തില് 154 റണ്സില്. ഒരു ദിവസവും ആറ് വിക്കറ്റും ശേഷിക്കെ കേരളത്തിന് 210 റണ്സ് ലീഡായി. സ്കോര്: കേരളം – 342, 154/4, ഗോവ – 286.
ആറിന് 169 എന്ന നിലയില് ബാറ്റിങ് തുടര്ന്ന ഗോവയെ ഭേദപ്പെട്ട സ്കോറിലേക്ക് നയിച്ചത് എട്ടാമനായിറങ്ങിയ ഷദബ് ജകാതി (85). ടീമിന്റെ ടോപ് സ്കോററും ജകാതി. കേരളത്തിനായി വിനോദ് കുമാര് നാലും സന്ദീപ് വാര്യര് മൂന്നും വിക്കറ്റെടുത്തു. ഫാബിദ് അഹമ്മദ്, ഇഖ്ബാല് അബ്ദുള്ള എന്നിവര്ക്ക് ഓരോ വിക്കറ്റ്.
രണ്ടാമിന്നിങ്സ് തുടങ്ങിയ കേരളം 54 റണ്സെടുക്കുന്നതിനിടെ നാല് വിക്കറ്റ് നഷ്ടപ്പെട്ട് പ്രതിസന്ധിയിലായെങ്കിലും നായകന് രോഹന് പ്രേമും (60), വിക്കറ്റ് കീപ്പര് ബാറ്റ്സ്മാന് മുഹമ്മദ് അസറുദ്ദീനും (56) കേരളത്തെ കരകയറ്റി. പിരിയാത്ത അഞ്ചാം വിക്കറ്റില് ഇവരും ഇതുവരെ 100 റണ്സ് ചേര്ത്തു. മൂന്നു വിക്കറ്റെടുത്ത സൗരഭ് ബന്ദേക്കറാണ് കേരളത്തിന്റെ മുന്നിരയെ തകര്ത്തത്. ഫെലിക്സ് അലെമാവോയ്ക്ക് ഒരു വിക്കറ്റ്.
