വിമുക്തഭട സംഗമത്തിനെത്തിയ വിമുക്തഭടന്മാര്ക്കൊപ്പം സതേണ് കമാന്റ് ജനറല് ഓഫീസര് കമാന്റിംഗ് ഇന് ചീഫ് ലെഫ്റ്റനന്റ് ജനറല് പി.എം.ഹാരിസ്
കോഴിക്കോട്: വിമുക്തഭടന്മാരുടെയും ആശ്രിതരുടെയും പ്രശ്ന പരിഹാരത്തിനായി സംഘടിപ്പിച്ച വിമുക്തഭട സംഗമവും റാലിയും നറുകണക്കിനാളുകള്ക്ക് ആശ്വാസമായി. ഇന്ത്യന് ആര്മിയുടെ ആഭിമുഖ്യത്തില് മലാപ്പറമ്പ് വേദവ്യാസ വിദ്യാലയത്തില് നടന്ന സംഗമത്തില് കോഴിക്കോട്, മലപ്പുറം, വയനാട് ജില്ലകളില് നിന്നായി ഏകദേശം രണ്ടായിരത്തോളം പേരാണ് പങ്കെടുത്തത്. പെന്ഷന്, കാന്റീന്, ആ രോഗ്യ സംബന്ധമായ പ്രശ്നങ്ങള് എന്നിവ സംബന്ധമായ പരാതികള്ക്കായിരുന്നു കൂടുതല് ഊന്നല് നല്കിയിരുന്നത്. വിവിധ വകുപ്പ് ഉദ്യോഗസ്ഥര് തന്നെ നേരിട്ട് പരാതികള് സ്വീകരിച്ചതിനാല് പരാതികള്ക്ക് വേഗത്തില് തീര്പ്പു കല്പ്പിക്കുന്നതിനാവശ്യമായ നടപടികള് സ്വീകരിക്കും.
മുഖ്യാതിഥിയായി പങ്കെടുത്ത സതേണ് കമാന്റ് ജനറല് ഓഫീസര് കമാന്റിംഗ് ഇന് ചീഫ് ലെഫ്റ്റനന്റ് ജനറല് പി.എം. ഹാരിസ് വിമുക്ത ഭടന്മാര്ക്കും ആശ്രിതര്ക്കുമാവശ്യമായ നിര്ദ്ദേശങ്ങള് നല്കി. വിമുക്തഭടന്മാരുടെ പ്രശ്നങ്ങള്ക്ക് സര്ക്കാര് പ്രഥമ പരിഗണന നല്കുന്നുണ്ട്. പദ്ധതികളെയും ആനുകൂല്യങ്ങളെയും കുറിച്ചുള്ള അറിവില്ലായ്മ കാരണം പൂര്ണ്ണമായി പ്രയോജനപ്പെടുത്തുന്നില്ലെന്നും അദ്ദേഹം പറഞ്ഞു. ചടങ്ങില് സെറീന ഹാരിസ് നിലവിളക്ക് തെളിയിച്ചു.
മാതൃരാജ്യത്തിനുവേണ്ടി വീരമൃത്യുവരിച്ച സൈനികരുടെ ഭാര്യമാരെയും യുദ്ധത്തില് പരിക്കേറ്റ ജവാന്മാരെയും ചടങ്ങില് ആദരിച്ചു. യുദ്ധത്തില് പരിക്കേറ്റ് അംഗവൈകല്യം സംഭവിച്ച ജവാന്മാര്ക്കായി മൊബിലിറ്റി സ്കൂട്ടറുകളും വിതരണം ചെയ്തു. വിമുക്ത ഭടന്മാര്ക്കും ആശ്രിതര്ക്കുമായി സൗജന്യ മെഡിക്കല് ചെക്കപ്പിനുള്ള സൗകര്യങ്ങളും ഒരുക്കിയിരുന്നു.
വിമുക്ത ഭടന്മാരുടെയും ആശ്രിതരുടെയും പ്രശ്ന പരിഹാരത്തിനായി റെക്കോര്ഡ് ഓഫീസുകള്, എസ്ബിഐ, എസ്ബിടി, സിന്ഡിക്കേറ്റ്, കനറാ എന്നീ ബാങ്കുകളുടെ സെന്ട്രല് പ്രോസസ്സിംഗ് പെന്ഷന് സെല്, ജില്ലാ സൈനിക് വെല്ഫെയര് ഓഫീസ്, ആധാര് രജിസ്ട്രേഷന് ഓഫീസ്, വിമുക്ത ഭടന്മാരുടെ ജോലി സംബന്ധമായ ഓഫീസ്, ആര്മി വെല്ഫെയര് എഡ്യുക്കേഷന് സൊസൈറ്റി ഓഫീസ്, റിക്രൂട്ടിംഗ് ഓഫീസ്, ബാങ്കിംഗ് ഫെസിലിറ്റി ഫോര് ലോണ്, എല്ലാവിധ മെഡിക്കല് സൗകര്യങ്ങളും ഉള്ള ഇസിഎച്ച്എസ് എന്നീ കാര്യാലയങ്ങള് രാവിലെ എട്ടു മുതല് വിദ്യാലയത്തില് പ്രവര്ത്തിച്ചു.
വിമുക്ത ഭടസംഗമം സംഘടിപ്പിക്കുന്നതിന് നേതൃത്വം നല്കിയ കോഴിക്കോട് മിലിട്ടറി സ്റ്റേഷന് ഓഫീസര് കേണല് പി. മോഹന്ദാസന്, സുബേദാര് മേജര് എം.വി. രാജേഷ്, എ. വിനുമോഹന്, എം.സി. ജയരാജന്, എം.ഡി. അന്വര് എന്നിവരെ ലെഫ്റ്റനന്റ് ജനറല് പി.എം. ഹാരിസ് ആദരിച്ചു.
