കല്‍പ്പാത്തി രഥോത്സവത്തിന്റെ ഒന്നാം ദിവസം ശ്രീവിശാലാക്ഷി സമേത വിശ്വനാഥ സ്വാമിക്ഷേത്രത്തിലെ രഥങ്ങള്‍ ഗ്രാമപ്രദക്ഷിണം നടത്തിയപ്പോള്‍
പാലക്കാട്: കാശിയില്‍പ്പാതിയെന്ന് വിഖ്യാതമായ കല്‍പ്പാത്തിയില്‍ മംഗളവാദ്യാഘോഷങ്ങളുടെ അകമ്പടിയില്‍ ദേവരഥപ്രയാണം തുടങ്ങി.
കല്‍പ്പാത്തി രഥോത്സവത്തിന്റെ ഒന്നാം ദിവസമായ ഇന്നലെ ശ്രീവിശാലാക്ഷി സമേത വിശ്വനാഥ സ്വാമിക്ഷേത്രത്തിലെ മൂന്നുരഥങ്ങളാണ് ഗ്രാമപ്രദിക്ഷിണം നടത്തിയത്. വിശ്വനാഥസ്വാമിയുടെ പ്രധാനരഥവും പരിവാര മൂര്‍ത്തികളായ ഗണപതി, വള്ളിസേനാസമേത സുബ്രഹ്മണ്യസ്വാമി എന്നിവരുടെ രഥങ്ങളാണ് അഗ്രഹാര പ്രദക്ഷിണത്തിനിറങ്ങിയത്.
പുതിയ കല്‍പാത്തി ഗ്രാമത്തിലേക്ക് എഴുന്നള്ളിയ കൈലാസപതിയും കുടുംബവും അഗ്രഹാരത്തില്‍ കുറച്ചുദൂരം സഞ്ചരിച്ചതോടെ രാവിലത്തെ പ്രദക്ഷിണത്തിനു സമാപനമായി. പിന്നീടു വൈകിട്ട് നാലിനു രഥപ്രയാണം പുനരാരംഭിച്ചു.
കര്‍പ്പൂരാരതിയും നിറദീപവുമായി നൂറ്കണക്കിന് ഭക്തജനങ്ങള്‍ ദേവരഥങ്ങളെ വരവേറ്റു. ഉത്സവം കൊടിയേറിയ ദിവസം മുതല്‍ വിശ്വനാഥ സ്വാമിക്ഷേത്രത്തില്‍ ആരംഭിച്ച വേദപാരായണം സമാപിച്ചു. രാവിലെ ഉപനിഷദ് പാരായണവും വിശാലാക്ഷീസമേത വിശ്വനാഥസ്വാമിയുടെ തിരുകല്ല്യാണ ഉത്സവവുംം നടന്നു.
പാലക്കാട് രാജാവിന്റെ പ്രതിനിധിയായ ക്ഷേത്രം ട്രസ്റ്റിയെ ആചാരപൂര്‍വ്വം ആനയിക്കുന്നതുള്‍പ്പെടെയുള്ള പരാമ്പരാഗതചടങ്ങുകള്‍ക്കെല്ലാം ക്ഷേത്രഭാരവാഹികളും ഗ്രാമവാസികളും ഉള്‍പ്പെടെയുള്ള നൂറുകണക്കിന് ഭക്തജനങ്ങള്‍ സാക്ഷിയായി. ക്ഷേത്രഗോപുരം കടന്ന് രഥങ്ങള്‍ പുറത്തിറങ്ങിയതോടെ രഥം വലിക്കാന്‍ പ്രായ,ദേശവ്യത്യാസമില്ലാതെ വന്‍ ജനപ്രവാഹമായിരുന്നു.
ഇന്ന് പുതിയ കല്‍പ്പാത്തി മന്താക്കര മഹാഗണപതിക്ഷേത്രത്തിലെ രഥവും കൂടി പ്രയാണത്തില്‍ പങ്ക് ചേരും. രാവിലെ പത്തിനും പതിനൊന്നിനുമിടയിലാണ് ഇവിടെ രഥാരോഹണം. തുടര്‍ന്ന് കുതിരവാഹനം അലങ്കാരം, എഴുന്നള്ളത്ത് എന്നിവ ഉണ്ടാവും.
മൂന്നാംതേര് ദിവസമായ നാളെ ചാത്തപ്പുരം പ്രസന്ന ഗണപതിക്ഷേത്രത്തിലെയും പഴയകല്‍പ്പാത്തി ലക്ഷ്മി നാരായണപെരുമാള്‍ ക്ഷേത്രത്തിലെയും രഥങ്ങള്‍ കൂടി പ്രയാണം നടത്തും. എല്ലാ രഥങ്ങളും നാളെ വൈകീട്ട് അഞ്ചിന തേരുമുട്ടിയില്‍ സംഗമിക്കുതോടെ രഥോത്സവത്തിന് സമാപനമാകും.
പ്രതികരിക്കാൻ ഇവിടെ എഴുതുക: