എഴുകോണ്: അര്ധരാത്രിയില് എഴുകോണ് എസ്ഐയും സംഘവും വിരമിച്ച സൈനികന്റെ വീട്ടില് അതിക്രമം കാട്ടി. ജനലുകളും വീട്ടുപകരണങ്ങളും തകര്ത്തു. 71 വയസുള്ള ഇടയ്ക്കോട് മങ്ങാട്ടുവീട് രാമചന്ദ്രന്റെ വീട്ടിലാണ് ബുധനാഴ്ച അര്ധരാത്രിയില് എത്തിയ പോലീസ് സംഘം അഴിഞ്ഞാടിയത്.
വിരമിച്ച അധ്യാപിക കൂടിയായ ഭാര്യ സുശീലയും രാമചന്ദ്രനും മാത്രമെ വീട്ടില് ഉണ്ടായിരുന്നുള്ളൂ. ഇവരുടെ മകന് ബിജെപി പഞ്ചായത്തുസമിതി പ്രസിഡന്റ് കൂടിയായ മനുവിനെ തിരക്കി എത്തിയതായിരുന്നു പോലീസ്. മനുവിനെതിരെ കള്ളകേസ് നിലവിലുണ്ട്. ഇതിനെതിര മുന്കൂര് ജാമ്യത്തിനായി ജില്ലാകോടതിയെ സമീപിച്ചിരിക്കുകയാണ്. കതക് തുറക്കാന് ആവശ്യപ്പെട്ട് എസ്ഐ മുനാഫും പോലീസ് സംഘവും മുന്വശത്തെ കതകില് ശക്തമായി പല തവണ ഇടിച്ചു. മകന് വീട്ടിലില്ലെന്നും പ്രായമായ തങ്ങള് മാത്രമെ ഉള്ളൂവെന്നറിയിച്ചപ്പോള് അസഭ്യം വിളിച്ചശേഷം ജനല് ലാത്തികൊണ്ട് അടിച്ച് പൊട്ടിക്കുകയും പിറകുവശത്തെ കതക് ചവിട്ടിതുറന്ന് അകത്ത് കയറി വീട്ടുപകരണങ്ങള് നശിപ്പിക്കുകയുമായിരുന്നു.
പ്രായമായ അമ്മയുടെ നിലവിളിപോലും ഇവര് ചെവികൊണ്ടില്ല. തങ്ങളുടെ വീട്ടില് അതിക്രമിച്ച് കയറി ഭീഷണിപെടുത്തുകയും നാശനഷ്ടം വരുത്തുകയും ചെയ്ത പോലീസുകാര്ക്കെതിരെ നടപടി ആവശ്യപ്പെട്ട് അമ്മ ഡിവൈഎസ്പിക്ക് പരാതി നല്കിയിട്ടുണ്ട്. നീതി ആവശ്യപ്പെട്ട് മനുഷ്യാവകാശ കമ്മീഷന്, വനിതാകമ്മീഷന്, ഡിജിപി, മുഖ്യമന്ത്രി, പോലീസ് കംപ്ലയിന്റ് അതോറിറ്റി എന്നിവര്ക്കും ഉടന് പരാതി നല്കും. ഗുണ്ടാനേതാക്കള്ക്ക് ജാമ്യം എടുത്ത് നല്കാന് മത്സരിക്കുന്ന പോലീസ് മുന്കൂര് ജാമ്യത്തിനായി കോടതിയെ സമീപിച്ച ബിജെപി നേതാവിന്റെ വീട്ടില് അതിക്രമിച്ച് കയറി കതക് ചവിട്ടിപൊളിക്കുകയും മാതാപിതാക്കളെ ഭീഷണിപെടുത്തുകയും ചെയ്തത് ഹീനമായ നടപടിയാണെന്ന് ബിജെപി മണ്ഡലം പ്രസിഡന്റ് സി.വിജയകുമാറും വൈസ്പ്രസിഡന്റ് ശ്രീനിവാസനും പറഞ്ഞു. അതിക്രമത്തിന് ഉത്തരവാദിയായ എസ്ഐക്കും പോലീസുകാര്ക്കും എതിരെ നടപടി എടുത്തില്ലെങ്കില് ശക്തമായ പ്രക്ഷോഭത്തിന് പാര്ട്ടി നേതൃത്വം നല്കുമെന്നും പോലിസിനെ ഉപയോഗിച്ച് ബിജെപിയുടെ പ്രവര്ത്തനം തടയാമെന്നത് സിപിഎമ്മിന്റെ വ്യാമോഹമാണന്നും ചൂണ്ടിക്കാട്ടി.
